नेपाल प्रहरीका महानिरीक्षक (आइजिपी) मा प्रकाश अर्याललाई नियुक्त गर्ने मन्त्रिपरिषदको सोमबार साँझको निर्णयविरुद्ध डिआइजी नवराज सिलवालले मंगलबार सर्वोच्च अदालतलमा रिट निवेदन दायर गरेका छन्।
आइजिपीका दाबेदार चार डिआइजीमध्ये वरिष्ठता र कार्यसम्पादन मूल्यांकनका आधारमा आफू सबभन्दा माथि रहेको दाबी गर्दै सरकारको निर्णयविरुद्ध रिट दायर गरेका हुन्।
रिट निवेदनमा उनले आफू र नवनियुक्त आइजिपी अर्यालको चार वर्षको कार्यसम्पादन मूल्यांकनसमेत दाँजेर पेस गरेका छन्। जसअनुसार आर्थिक वर्ष २०६९/७० मा सिलवालको अंक १४८ छ भने अर्यालको १४७ छ। त्यसपछिका तीन आर्थिक वर्षमा दुवैको अंक बराबर देखिन्छ। २०७०/७१ मा दुवैको अंक ३६, २०७१/७२ मा ३९ र २०७२/७३ मा ४० छ। यसरी कुल अंकमा सिलवाल २६३ र अर्याल २६२ रहेको रिट निवेदनमा उल्लेख गरिएको छ।
यसअघि सर्वोच्चबाट ‘बहालवाला डिआइजीमध्ये जेष्ठ र कार्य सम्पादन मूल्यांकनमा उच्चतम अंक प्राप्तलाई बढुवा गर्नु गराउनु भनी परामादेशको आदेश जारी भएको’ उद्धृत गर्दै रिट निवेदनमा भनिएको छ, ‘सरकारलाई पुनः पिक एन्ड चुज गरी अर्याललाई बढुवा गर्न पाउने अधिकार कदापि छैन। सरकारको चैत २८ को निर्णय मनोमानी र स्वैच्छाचारी छ।’