भारतीय क्रिकेटमा पूर्व स्टार ब्याट्सम्यान जतिबेला ब्याटिङ गर्न मैदानमा उत्रिन्थे, त्यतिबेला दर्शकदीर्घाबाट एउटै आवाज आउने गर्दथ्यो, ‘सचिन...सचिन।’ के तपाईंहरुलाई थाहा छ, यो लयलाई पहिलो पल्ट उच्चारण गर्ने व्यक्ति को हुन्?
सचिनले उनका समर्थकमाझ कौतुहल बनेको यो लयको उद्घोष कसरी भयो? यसको गोप्यता पहिलो पल्ट सार्वजनिक गरेका छन्। आफ्नो जीवनीमा आधारित फिल्म ‘सचिन अ बिलियन ड्रीम्स’ को एउटा गीत सार्वजनिक समारोहमा पुगेका सचिनले यो पुरै कथाको पटाक्षेप गरे।
उनले मैदानभन्दा अगाडि आफ्नी आमाले यसको सुरुवात गरेको बताए। ‘जब म खेलेर घर फर्किन्थेँ आमाले मलाई यही लयमा बोलाउनु हुन्थ्यो,’ सचिनले भने। उनले आमाको त्यही लय पछि मैदानमा गुञ्जिन थालेको बताए।
‘सचिन अ बिलियन ड्रीम्स’ को गीत पनि ‘सचिन..सचिन’ को लयमै छ। यो गीतलाई सुखविन्दर सिंहले आवाज दिएका छन्। कम्पोज भने एआर रहमानको छ।
सचिनले यही अवसरमा आफूले बच्चामा ब्याट समातेर खिचेको चर्चित फोटोको कथा पनि बताए। उनले त्यो फोटो भाइसँग घरमा खेलिरहेको अवस्थामा लिएको बताए। ‘फोटो बालकनीमा लिएको हो। त्यतिबेला मेरो उमेर ४–५ वर्षको हुनुपर्छ। त्यतिबेला मेरो पोजिसन राम्रो थिएन। बललाई हिर्काउन खुब मजा लाग्थ्यो। कहिलेकाँही म बललाई ब्याटले हिट गर्थें, कहिले टेनिस र्याकेटले,’ उनले भने।
