सत्ता साझेदार तथा भरतपुर र पोखरा महानगरको स्थानीय निर्वाचनमा गठवन्धन गरेका नेपाली कांग्रेस र माओवादी केन्द्रका अध्यक्षले बिहीबार भरतपुरमा आयोजित चुनावी सभामा पनि एकसाथ सम्बोधन गरे।
माओवादी केन्द्रबाट भरतपुर महानगरपालिकाका मेयर उम्मेदवार रेणु दाहालको चुनावी प्रचार क्रममा आयोजित उक्त सभामा कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल दुवैले ‘कांग्रेस–माओवादी गठवन्धन दीर्घकालसम्म जाने’ घोषणा गरेका थिए।
‘हाम्रो यो गठवन्धन देशको आवश्यकताअनुसार भएको हो, यो दीर्घकालसम्म रहन्छ,’ छोरी रेणुको चुनाव प्रचार निम्ति देउवासँग एउटै जहाजमा सँगसँगै सिटमा बसेर भरतपुर आएका प्रधानमन्त्री दाहालले भने, ‘आगामी समयमा हुने प्रान्तीय र केन्द्रीय निर्वाचनमा पनि कांग्रेस–माओवादी गठवन्धन कायम रहनेछ।’
उनले त्यही सम्बोधनकै क्रममा कांग्रेस सभापति देउवालाई भावी प्रधानमन्त्रीका रूपमा प्रस्तुत गरे। भने, ‘हाम्रो अबको प्रधानमन्त्री शेरबहादुर हुन्, हाम्रो यो गठवन्धनमाथि कसैले शंका नगरे हुन्छ।’
कांग्रेस र माओवादीबीच देशको राजनीतिक परिस्थिति विचार गरेर विगतमा पनि कार्यगत एकता भएको स्मरण गराउँदै दाहालले भने, ‘विगतमा राजाले शासन लिएपछि गणतन्त्र ल्याउन बाह्रबुँदे सम्झौता हुँदा गिरिजाप्रसाद कोइराला र माओवादीको तर्फबाट मैले हस्ताक्षर गरेको हुँ।’
‘अहिले फेरि त्यस्तै स्थिति आएको छ। लोकतन्त्र जोगाउन, अहिलेसम्म प्राप्त उपलब्धि संरक्षण गर्न र संविधान कार्यान्वयन गर्न हाम्रो एकता अत्यन्त जरुरी हुन आयो,’ उनले भने।
देउवाले पनि माओवादीसँगको सहकार्य देशको आवश्यकताअनुसार भएको बताए। ‘हाम्रो यो गठवन्धन संविधान कार्यान्वयनको निम्ति हो,’ उनले भने, ‘एमालेले देशलाई तराई र पहाडमा विभाजन गर्न खोजेको थियो, त्यस्तो विभाजन आउन नदिन र देशलाई भौगोलिक रूपले एकताबद्ध गराउन हामीले यो गठनवन्धन गरेका हौं।’
उनले पनि कांग्रेस–माओवादी गठवन्धन आगामी प्रान्तीय र केन्द्रीय दुवै निर्वाचनसम्म कायम रहने बताए।
सत्तारुढ दलहरू कांग्रेस र माओवादीले यसपालि स्थानीय निर्वाचनमा भरतपुर र पोखराको निम्ति गठवन्धन गरेका छन्। भरतपुर महानगरपालिकाको मेयरका निम्ति कांग्रेसले सुरुमा दिनेश कोइरालालाई टिकट दिएर पठाएको थियो। माओवादीसँग तालमेल भएपछि कोइरालाको उम्मेदवारी फिर्ता लिन लगाइयो। यसले भरतपुरमा कांग्रेस सभापति देउवाको विरोध गर्दै पुत्ला जलाइएको थियो।
सत्तारुढ दलहरूको यो चुनावी गठवन्धन दाहालपुत्री रेणुको निम्ति हो। दाहालले भने रेणुलाई आफ्नी छोरीको रूपमा मात्र प्रस्तुत गरेको मन नपर्ने बताएका छन्। ‘रेणुलाई दाहालपुत्री भनेको मलाई मन पर्दैन, उनको आफ्नै क्षमता र योगदान छ,’ दाहालले भने।
छोरीको जितका लागि कांग्रेससँगको चुनावी तालमेलप्रति मतदाताको विश्वास जित्न खोजिरहेका दाहाल कांग्रेस पार्टीको परम्परागत सम्बोधन अनुसरण गर्न पनि पछि परेनन्। उनले चुनावी सभामा ‘धन्यवाद, जयनेपाल’ भन्दै आफ्नो सम्बोधन टुंग्याएका थिए।
