बागमती प्रदेशका सभामुख भुवनकुमार पाठकले सर्वदलीय बैठक बोलाएका छन्।
शुक्रबार दिउँसो १ बजे बस्नेगरी सभामुख पाठकले प्रदेशसभामा प्रतिनिधित्व गर्ने दलका नेता र प्रमुख सचेतकहरूको बैठक बोलाएका हुन्।
सभामुख पाठकका अनुसार दुई विषयमा छलफल गर्न बैठक बोलाइएको हो।
पहिलो संसदीय समितिमा अध्यक्ष चुन्नेबारे र दोस्रो बजेट व्यवस्थापनका लागि छलफल गर्न संसद अधिवेशन बोलाउनेबारे।
बागमती प्रदेशसभा गठन भएको डेढ वर्ष नाघिसक्दा पनि संसदीय समितिहरू नेतृत्वविहीन छन्।
बागमतीमा पाँच वटा संसदीय समिति छन् ती पाँचैवटा समितिमा सभापति छैनन्।
‘यसअघि पटकपटक प्रयास गर्यौं भएन। धेरै ढिला भइसक्यो। अब जतिसक्दो चाँडो नियुक्त गर्नुपर्छ भन्नेबारे दलहरूसँग छलफल गर्न लागेको हुँ,’ सभामुख पाठकले भने।
मुख्यमन्त्री शालिकराम जम्कट्टेलले तस्रो पटक विश्वासको मत लिएपछि चैत १९ देखि अधिवेशन अन्त्य भएको थियो।
‘अब बजेट ल्याउने बेला हुन लाग्यो। त्यसबारे पनि संसदमा छलफल गर्नुपर्छ। त्यसकारण अधिवेशन बोलाउने विषयमा पनि छलफल गर्न बैठक बोलाइएको हो,’ सभामुख पाठकले भने।
बैठक प्रदेश सभा सचिवालय भवनमा बस्नेछ।
