फेसबुकले प्रोफाइल र कभर तस्बिर कसैले पनि डाउनलोड वा सेयर गर्न नसक्ने गरी नयाँ टुलको विकास गरेको छ। फेसबुक प्रयोगकर्ताले राखेका तस्बीरहरू आफैंमा सुरक्षित गर्न फेसबुकले यस्तो टुल विकास गरेको फेसबुकले जनाएको छ।
यो टुलको प्रयोग भने अहिलेलाई भारतमा मात्र हुनेछ। भारतमा गरिएको अभ्यासको आधारमा अन्य देशमा पनि यो प्रविधिको सुरुवात गर्ने फेसबुकले जनाएको छ। फेसबुककी प्रोडक्ट म्यानेजर आरती सोमनले भनिन्, ‘भारतमा गरिएको अभ्यास र प्रयोगको आधारमा यो टुल अन्य देशमा पनि सुरू हुन्छ।’
उनले फेसबुकमा नयाँ टुल जोडिएपछि प्रयोगकर्ताले प्रोफाइल तस्बिर डाउनलोड र सेयर गर्न नसक्ने बताईन्। यसैगरी फेसबुकमा साथी नभएकाहरुले ट्याग पनि गर्न नसक्ने उनले बताईन्।
‘यस टुलको मद्दतले तस्बिरहरुको गलत प्रयोग हुनबाट रोक्न सकिन्छ,’ उनले भनिन् ।
फेसबुकमा गरिएको एक अध्ययनले फेसबुक प्रयोगकर्ता महिलाहरु आफ्नो तस्बिरको गलत प्रयोग हुन जाने डरले अनुहार देखिने प्रोफाइल तस्बिरहरू हाल्न डराउने गरेका छन्।
