एमाले उपाध्यक्ष भिम रावलको गृह जिल्ला अछाममा एमाले पछाडि परेको छ। अछामका दश वटा स्थानीय तहमा चार वटा स्थानीय तहको नतिजा आइसकेको छ। जसमध्ये तीन वटामा कांग्रेसले जितेको छ भने एउटामा माओवादी केन्द्र विजयी भएको छ।
कमलबजार नगरपालिका, बान्नीगढी जयगढी गाउँपालिका र ढकारी गाउँपालिकामा कांग्रेस विजयी भएको छ । नेकपा माओवादी केन्द्रले मेल्लेख गाउँपालिकामा विजय हासिल गरेको छ।
मतगणना भइरहेका छ स्थानीय तहमा नेपाली कांग्रेस तीन ठाउँमा अगाडि छ भने एमाले दुई ठाउँमा अगाडि छ । माओवादी केन्द्र एक ठाउँमा अगाडि रहेको छ।
साफेबगर, पञ्चदेवल विनायक नगरपालिका र तुर्माखाद गाउँपालिकामा कांग्रेसले अग्रता लिएको छ।
नेकपा एमालेले मंगलसेन नगरपालिका र चौरपाटी गाउँपालिकामा अग्रता लिएको छ। माओवादी केन्द्रले रामारोशन गाउँपालिकामा अग्रता लिएको छ।
संविधानसभाको दोस्रो निर्वाचनमा अछामका दुई क्षेत्रबाट एमाले अध्यक्ष भिम रावल र भरत साउद विजयी भएका थिए।
अछामका अधिकांश स्थानीय तहमा कांग्रेस र माओवादी केन्द्रबीच चुनावी तालमेल भएको थियो।