नेकपा एमालेको गढ मानिने मोरङको सुन्दरहरैचा नगरपालिकामा ३७ हजार मतगणना गरिसक्दा नेपाली कांग्रेसले ५ सय ५७ मतले अग्रता लिएको छ।
पछिल्लो पटक सार्वजनिक मतपरिणामअनुसार नेपाली कांग्रेसका मेयर पदका उम्मेद्वार शिवप्रसाद ढकालले १५ हजार २ सय ६१ मत प्राप्त गरेका छन्। उनका निकटतम् प्रतिद्वन्दी एमालेका केदारप्रसाद गुरागाईँले १४ हजार ७ सय ४ मत प्राप्त गरी पछ्याइरहेका छन्। माओवादी केन्द्रका मेयर पदका उम्मेदवार लक्ष्मी न्यौपाने (लता) ले २ हजार ४ सय १७ मत ल्याएकी छिन्।
त्यस्तै उप–मेयरतर्फ एमालेकी धनमाया तामाङले १४ हजार ४ सय ४२ मत ल्याएर अग्रस्थानमा रहेकी छन्। उनको निकटतम प्रतिद्वन्दी कांग्रेसकी बिन्दा दाहाल थापाले ११ हजार ८ सय ५१ मत प्राप्त गरेकी छिन्। माओवादी केन्द्रबाट चर्चामा रहेका उपमेयर पदका उम्मेदवार नवराज चापागाईंले ५ हजार ७ सय ६३ मत प्राप्त गरेका छन्। अहिले नगरको ६ र ७ नम्बर वडाको मतगणना जारी रहेको छ ।