नेपाल राष्ट्र बैंकले वित्तीय साक्षरता अभियानलाई तीव्र पार्ने जनाएको छ। प्रत्येक स्थानीय तहमा बैंकहरुको शाखा पुर्याएर मात्रै नहुने भएकाले गाउँगाउँमा साक्षरता अभियान चाल्नेगरी अघि बढ्ने तयारी भएको डेपुटी गभर्नर चिन्तामणि शिवाकोटीले बताए।
मुलुकलाई आर्थिक रुपमा सम्पन्न गराउन पनि वित्तीय साक्षरता अभियानलाई व्यापक बनाउनुपर्ने बेला आएको उनले बताए। बुधबार ललितपुरमा आयोजित लघु, साना तथा मझाैला उद्योमीहरुको अन्तरराष्ट्रिय गोष्ठीलाई सम्बोधन गर्दै उनले भने ‘नेपाल राष्ट्र बैंकले वित्तीय साक्षरता अभियान संचालन गर्नका लागि नेतृत्वदायी भूमिका निर्वाह गर्नेछ, बैंकदेखि लघुवित्तहरुले पनि यसमा साथ दिनु पर्छ।’
डेपुटी गभर्नर शिवाकोटीले लघु, साना तथा मझाैला उद्योमीहरुलाई आवश्यक कर्जा प्रवाह गर्न बैंक तथा वित्तीय संस्थाहरु इच्छुक रहेको बताए। उनले कर्जा प्रवाह र यसबाट लिने व्यावसायिक फाईदाका विषयमा भने अझै पनि साना उद्योगीहरु जानकार नरहेको पनि बताए ।
नेपाल राष्ट्र बैंकले लघु, साना तथा घरेलु उद्योगको विकासका लागि आवश्यक लगानी गर्न बैंक तथा वित्तीय संस्थाहरुलाई पटक–पटक निर्देशन दिँदै आएको छ।