बाँकेको कोहलपुर–४, बेलनापुरमा श्रीमतीको घाटी रेटेर हत्या गर्ने एक व्यक्तिले श्रीमतीको काटिएको टाउकोसहित प्रहरी कार्यालय पुगेर आत्मसर्मपण गरेका छन्।
कोहलपुर–४ बेलनापुरका २९ वर्षीय अहमद अफताब बेडुवाले २६ वर्षीया श्रीमती फूलचन बेडुवाको हत्यापछि टाउकोसहित इलाका प्रहरी कार्यालय कोहलपुरमा पुगेर आत्मसमर्पण गरेको प्रहरीले जानकारी दिएको छ।
राति १० बजे श्रीमतीको हत्या गरेका बेडुवा साइकल चढेर टाउकोसहित प्रहरी कार्यालय पुगेका थिए ।
‘सधैंभरि किचकिच र झगडा गरेर सताउने बाहेक केही गरिनँ, त्यसैले हत्या गरिदिएँ’ इलाका प्रहरी कार्यालयका नायव उपरीक्षक सुरेशप्रसाद काफ्लेले बेडुवाले प्रहरीमा दिएको बयानबारे बताए।
दुई श्रीमती रहेका बेडुवाले जेठीको हत्या गरेका हुन्। ज्यामी काम गरेर जीविकोपार्जन गर्दै आएका उनीसहित उनको कान्छी श्रीमतीलाई पनि प्रहरीले नियन्त्रणमा लिएको छ। घटनाबारे थप छानबिन भइरहेको काफ्लेले बताए।
