प्रमुख तीन दल नेपाली कांग्रेस, नेकपा एमाले र माओवादी केन्द्रको बालुवाटारमा बसेको बैठक सकिएको छ।
तीनै दलका शीर्ष नेताहरुको सहभागी बैठकमा संविधान सशोधनका विषयमा छलफल भए पनि कुनै सहमति हुन सकेन।
बैठकपछि सञ्चारकर्मीसँगै कुरा गर्दै एमाले उपाध्यक्ष भीम रावलले सत्ता पक्षले संविधान संशोधनका विषयमा तीन प्रस्ताव राखेको तर एमालेले संशोधनको कुरा तेस्रो चरणको चुनावपछि मात्र गर्नुपर्ने बताएको जानकारी दिए।
‘उहाँहरुले संशोधनमा सहमति गरौं कि मतदानमा जाऔं नभए यसलाई थाँति राख्यौं भन्नुभयो,’ रावलले भने, ‘हामीले संशोधनका बारे अहिले कुरा नगरौं जे गर्नुपर्छ असोज २ को चुनावपछि गरौंला भन्यौं।’
नेपाली कांग्रेसका नेता विमलेन्द्र निधिले एमालेलाई संशोधनका पक्षमा आउन आफूहरुले आग्रह गरेको भएपनि त्यसलाई एमालेले स्वीकार नगरेको बताए। ‘हामीले उहाँहरूलाई चुनाव अघि नै संशोधन टुंग्याएर जाउँ भनेका हौं तर उहाँहरूले मान्नुभएन,’ निधिले भने, ‘ संसदमा तत्काल संशोधनका पक्षमा दुई तिहाइ पुग्ने अवस्था छैन, यसबारे अब भोलि राजपा नेताहरुसँग कुराकानी गर्छौं।’
