द टिम्बर कर्पाेरेशन अफ नेपाल लिमिटेडले भरतपुरमा काठको सिजनिङ तथा प्रशोधन प्लाण्ट निर्माणका लागि सोमबार भवन शिलान्यास गरेको छ ।
कर्पाेरेशनका महाप्रबन्धक राजु लौडारीले उक्त भवनको शिलान्यास गरेका हुन् । दुई करोड ५० लाख रुपैयाँको लागतमा निर्माण गर्न लागिएको सो प्लाण्ट तीन महीनाभित्र काम सम्पन्न गर्ने कम्पनीले लक्ष्य लिएको छ । प्लाण्टका लागि आवश्यक पर्ने उपकरण नेपालमा भित्रिइसकेको छ ।
महाप्रबन्धक लौडारीका अनुसार नरम र कुकाठलाई सिजनिङ र प्रशोधन गरी लामो समयसम्म टिकाउ र बलियो बनाइने छ । सिजनिङले काठको पानीको मात्रालाई घटाउने काम गर्छ भने प्रशोधनले कुनै पनि रोग लाग्न नदिने गरी रसायन प्रयोग गरेर काठलाई बलियो बनाउने काम गर्छ ।
सो अवसरमा लौडारीले प्लाण्ट देशको मध्यभागमा रहेकाले देशका जुनसुकै ठाउँबाट पनि काठ ल्याउन मिल्ने भएकाले चितवनमा प्लाण्ट जडान गर्न लागिएको बताए । नेपालमै ठूलो परिमाणमा काठ सिजनिङ गर्ने यो पहिलो प्लाण्ट हो । लौडारीका अनुसार यो प्लाण्टले एक वर्षमा एक लाख २० हजार क्यूविक फिट काठ सिजनिङ र प्रशोधन गर्न सक्छ ।
जिल्ला वन कार्यालय चितवनका प्रमुख केदार पौडेलका अनुसार काठलाई सिजनिङ र प्रशोधन गरेपछि १० गुणासम्म बलियो र टिकाउ हुन्छ । नेपालको पहाडी क्षेत्रमा रहेका सल्लो, उत्तिस, चिलाउने, तराईका सिसौ, साज, कर्मा, बकाइनाजस्ता काठ सिजनिङ गर्न सकिने उनले बताए ।
नेपालमा वर्षेनी रु तीन अर्बभन्दा बढीको काठ आयात हुने गरेकामा अब काठलाई सिजनिङ र प्रशोधन गर्न सके निर्यात गर्न सकिने सम्भावना रहेको छ ।
विश्वका जुनसुकै देशमा पनि आफ्नै उत्पादन कमजोर काठलाई सिजनिङ र प्रशोधन गरेर आवश्यकता पूर्ति गर्ने गरेको पाइन्छ । सिजनिङ र प्रशोधन गरेपछि सबै काठ सालको काठसरह बलियो हुने र पसांगिदैन ।
नेपालमा मागको २५ प्रतिशत हाराहारीमात्रै सरकारी तवरबाट काठ आपूर्ति हुने गरेको छ ।
द टिम्बर कर्पाेरेशनले गत आवमा चार लाख क्वूविक फिट काठ विक्री गरेको जनाएको छ । महाप्रबन्धक लौडारीले चालू आवमा सात लाख क्यूविक फिट काठ विक्री गर्ने लक्ष्य रहेको बताए । सिजनिङ र प्रशोधन हुन थालेपछि निजी वनसँग समेत समन्वय गरेर काठ खरीद गरिने जानकारी उनले दिए । हाल टिम्बर कर्पाेरेशनले राष्ट्रिय वनबाट मात्रै काठ लिने गरेको छ । काठमाडाैंसहित देशका ११ वटा डिपोबाट कर्पाेरेशनले काठ विक्री गर्दै आएको छ ।
टिम्बर कर्पाेरेशन भरतपुरका प्रमुख प्रदीपकुमार निरौलाले काठको माग अत्यधिक भएको भन्दै प्लाण्ट राखेपछि केही हदसम्म यस क्षेत्रका जनतालाई बढी काठ दिन सकिने बताए । यो कार्यालयले गत आवमा २६ हजार क्यूविक फिट गोलाई किनेर १५ हजार क्यूविक फिट काठ विक्री गरेको जनाएको छ । रासस
