२०७० मा हारेका राजपा अध्यक्ष मण्डलका ५ नेता संसद फर्किए

सेतोपाटी संवाददाता

काठमाडौं, मंसिर २५

दोश्रो संविधानसभामा छुट्टा छुट्टै प्रतिष्पर्धा गरेर पराजय बेहोरेका राजपा अध्यक्ष मण्डलका पाँच नेता यसपटक प्रतिनिधि सभा निर्वाचनमा विजयी भएका छन्।

जितसँगै उनीहरू संसद फर्कने निश्चित भएको छ। राजपा अध्यक्ष मण्डलमा रहेका ६ नेतामध्ये महिन्द्रराय यादव मात्र २०७० मा विजयी भएका थिए। यादवले विगतमा जस्तै यसपटक पनि जित हासिल गरेका छन्। उनी सर्लाही २ बाट जंगीलाल रायलाई हराउँदै विजयी भएका हुन्।

यादवले २९ हजार १ सय ९१ मत ल्याए। जबकी पराजित रायको १८ हजार १ सय ७६ मत मात्र आयो। राजपाका संयोजक महन्थ ठाकुर, राजेन्द्र महतो, अनिलकुमार झा, शरतसिंह भण्डारी, राजकिशोर यादव २०७० मा पराजित भएपनि यसपटक विजयी भएका हुन्।

ठाकुर त्यतिबेला तमलोपाका अध्यक्ष थिए। महतो नेपाल सद्भावना पार्टीका अध्यक्ष थिए भने अनिलकुमार झा राष्ट्रिय सद्भावनाका अध्यक्ष बनेका थिए। त्यस्तै, शरतसिंह भण्डारी राष्ट्रिय मधेस समाजवादी पार्टीको अध्यक्षको हैसियतमा चुनाव लडेका थिए। राजकिशोर यादवले फोरम गणतान्त्रिकको अध्यक्षको रूपमा २०७० मा चुनावी मैदानमा पाइला राखेक थिए। तर, सबै जनाले हार बहोर्नु परेको थियो।

महन्थ ठाकुर यसपटक महोत्तरी ३ बाट विजयी भएका हुन्। ठाकुरले २६ हजार ८ सय ५४ मत ल्याए। जबकी प्रतिष्पर्धी एमालेका विजयकुमार चौधरीले मात्र ८ हजार ६ सय ७६ मत ल्याए। अर्थात्, ठाकुर तेब्बरभन्दा धेरै मत अन्तरले विजयी भए। शरतसिंह भण्डारी महोत्तरी २ बाट विजयी भएका हुन्।

विजयी भण्डारीले ३० हजार ७ सय २२ मत ल्याए। उनका निकटतम प्रतिद्वन्द्वी कांग्रेसका किरण यादवले आधा भन्दा कम मात्र मत प्राप्त गरे। यादवले केबल १३ हजार ९ सय ७४ मत ल्याउन सके। त्यस्तै, राजेन्द्र महतो धनुषा ३ बाट विजयी भए। उनले कांग्रेसका विमलेन्द्र निधिलाई पराजित गरे।

विगतका निर्वाचनमा सर्लाहीबाट उम्मेद्वार बनेका महतो यसपटक धनुषामा चुनाव उठेका थिए। महतो ३० हजार ७ सय ५० मत ल्याएर विजयी भए। जबकी निधिले २७ हजार ८ सय ४७ मत मात्र ल्याउन सके।

राजपा अध्यक्ष मण्डलका अर्का नेता राजकिशोर यादव सिरहा ४ बाट विजयी भएका छन्। यादवले २१ हजार १ सय ४४ मत ल्याए। उनका प्रतिष्पर्धी नेकपा माओवादी केन्द्रका अजयशंकर नायकले १७ हजार ५ सय ७५ मत ल्याएर हार बेहोरे।

त्यस्तै, राजपाका अर्का नेता अनिल झा रौतहट १ बाट विजयी भएका छन्। उनले २१ हजार ४ सय ७२ मत ल्याए। उनका प्रतिष्पर्धी कांग्रेसका कृष्णप्रसाद यादवले १५ हजार ८ सय ७४ मत ल्याएर पराजय बेहोरे।

प्रकाशित मिति: आइतबार, मंसिर २४, २०७४ १९:५९

सिफारिस