सडक डिभिजन कार्यालय जनकपुरले २०७१ असार ३१ मा पप्पु कन्ट्रक्सन पोखरिया पर्सासँग महोत्तरीको लोहारपट्टी रौजा बीचमा पर्ने रातु नदीमा पुल निर्माण गर्ने सम्झौता गर्यो।
१४ करोड, ६४ लाख ७४ हजार ६ सय ४७ रूपैयाँको सो योजना २०७३ पुस ३१ सम्ममा सम्पन्न हुनुपर्ने सम्झौता पत्रमा उल्लेख छ। तर, ठेक्काको म्याद समाप्त भएको एक वर्षभन्दा बढी समय वितिसक्दा पनि निर्माण अझै अपुरो छ। पुल निर्माण नहुँदा वर्षाको बेला आवतजावत ठप्प हुन्छ।
२०७२ असार १३ मा रामजानकी पथ (जनकपुर-मटिहानी सडक ) कालोपत्रे निर्माणको जिम्मा लिएको पप्पु कन्ट्रक्सनको प्रगति ५४ दशमलव ४५ प्रतिशत छ। ९ करोड ४७ लाख ७ हजार २ सय २८ रूपैयामा १५ किलोमिटर सडक कालोपत्रे गर्ने जिम्मा पाएका सो कम्पनीले हालसम्म ७ किलोमीटर सडकमा मात्र कालोपत्रे सकेको छ।
परिक्रमा सडक अन्तर्गत महोत्तरीको जलेश्वर-सुँगा-मटिहानी-तुल्सीयाही-वहेडा-वेला ११.४८ किलोमिटर सडक निर्माण गर्न एमएसएएमआर ईण्डिया लिमिटेड पप्पु कन्सट्रक्सन जेभीले २१ करोड ६५ लाख, ६६ हजार ८ सय ९९ रुपैंया ४२ पैसामा ठेक्का रकम कवोल ग जनवरी २०१८ मै सम्पन्न गर्नु पर्ने थियो। तर उक्त सडकको अहिलेसम्म ३३.६७ प्रतिशत मात्र काम सम्पन्न गरि छाडेपछि निर्माण अलपत्र छ। कम्पनीले ३ वटा ठेक्काको काम पाए कुनै पुरा भएका छैनन्।
यसबीचमा पप्पु कन्स्ट्रक्सनका निर्देशक सुमित रौनियारसँग सम्पर्क गर्न खोज्दा उनी सम्पर्कमा आउन चाहेनन्।
ठेक्का सम्झौता अनुसार तोकिएको समय सीमाभित्र काम नगर्ने ठेकेदार र उनीहरु सम्बद्ध कम्पनीको नाम गृह मन्त्रालयले संकलन गरेको छ।
महोत्तरीका विभिन्न भौतिक पूर्वाधार निर्माणको ठेक्का पाई सम्झौता अनुसार काम नसकेका एवम् नवीकरणका लागि सिफारिस गर्दै आएका ठेकेदार र कम्पनीको नाम संकलन गरि गृह मन्त्रालयमा पठाइएको छ।
जनताको तटबन्धको फिल्ड कार्यालय महोत्तरी, डिभिजन सडक कार्यालय जनकपुर, भूमिगत जल सिँचाई विकास डिभिजन महोत्तरी जिल्ला प्राविधिक कार्यालय, सिँचाई र जनककपुर परिक्रमा सडक अन्तर्गतको २१ वटा निर्माण कार्यको ठेक्का लिएर समयमै काम पूरा नगरेको र अटेर गरी बसेको ठेकेदार कम्पनिको नाम मन्त्रालयमा पठाइएको महोतरीका प्रमुख जिल्ला अधिकारी बाबुराम श्रेष्ठले बताए।
जिल्ला प्रशासन कार्यालय मार्फत गृह मन्त्रालयमा पुगेको विवरणअनुसार २१ ठेकेदारले काम ओगटने, सञ्चालन खर्च लिने तर काम सम्पन्न गर्नेतिर ध्यानै नदिने गरेको पाइएको छ। क्षमताभन्दा बढी ठेक्का लिने र मोविलाइजेसन बापतको रकम लिएर अन्य व्यवसायमा लगानी गर्ने ठेकेदारको प्रवृत्तिले आयोजना सम्पन्न हुन सकिरहेका छैनन्।
स्रोत साधनको अधिकतम् प्रयोग गर्न सकिने र सबैभन्दा धेरै नियामक निकाय भएको जिल्लामै ठेकेदार कम्पनीको यो हदसम्मको मनोमानी छ। यसमा अनुगमन र कडाई नगरी ठेकेदार कम्पनीको खुरुखुरु म्याद थप्ने सरकारी निकायका पदाधिकारी पनि कम जिम्मेवार छैनन्।
जनताको तटबन्धको फिल्ड कार्यालय महोत्तरीद्वारा राष्ट्रपति चुरे संरक्षण कार्य धनुषा महोत्तरी अन्तर्गतको रातो आरटिडब्लु किसान नगर र रातो आरटिडब्लु पशुपति नगरका लागि सविना निर्माण सेवा जनकपुर, रातो आरटिडब्लु हतिसर्वाका लागि जिके कन्ष्ट्रक्सन जनकपुर, रातो आरटिडब्लु कविलासाका लागि शिवम कन्स्ट्रक्सन जनकपुर, रातो आरटिडब्लु वनचौरीका लागि ओम दिप कन्स्ट्रक्सन जनकपुर, रातो आरटिडब्लु सिंग्याहीका लागि आशिश कन्स्ट्रक्सन, रातो आरटिडब्लु सिद्धि साई प्रकाश समाखुसी काठमाडौं, रातो आरटिडब्लु सिंग्याही र रातु आरटिडब्लु खैरवा भिटामोडका लागि हिमांसु लोकेस देव जेभी सुविधानगर काठमाडौंको नाम मन्त्रालयमा पठाइएको जिल्ला प्रशासन महोत्तरीले जनाएको छ ।
त्यस्तै डिभिजन सडक कार्यालय जनकपुरद्वारा सञ्चालित रामजानकी पथ मटिहानी जनकपुर सडक कालोपत्रेको काम पूरा नगरेकाले पप्पु कन्ट्रक्सन पर्सा, जधा पुल निर्माणको काम पूरा नगरेको रसुवा आश्रे जेभी, बिगही पुल निर्माण पूरा नगरेको रसुवा आश्रे जेभी र रातो नदी पुल निर्माण लोहारपटिको ठेक्का पूरा नगरेको पप्पु कन्स्ट्रक्सन पर्साको नाम गृह मन्त्रालयमा पठाइएको छ ।
यस्तै भूमिगत जल सिँचाई विकास डिभिजन महोत्तरी जलेश्वरद्वारा गौशाला नगरपालिका ९ वेलगाछी महोत्तरीमा डिप ट्युवेल निर्माणको ठेक्का लिएर काम पूरा नगरेका जेएच कन्ट्रक्सन प्रालि लुबु ४ ललितपुरको नाम गृह मन्त्रालयमा पठाइएको छ ।
त्यस्तै जनकपुर परिक्रमा सडक अन्तर्गत बेला मटिहानी सडक निर्माणको ठेक्का लिई म्याद गुज्रीसक्दा समेत काम नगरेको एएमआर इण्डिया लिमिटेड पप्पु कन्स्ट्रक्सन जेभी तीनकुने, लोहारपटि महेन्द्रनगर सडक निर्माणको ठेक्का लिएरर काम पूरा नगरेका एमएसवुड हिल इन्फ्रास्ट्रक्चर लिमिटेड लामा कन्स्ट्रक्सन प्रालि जेभी महाराजगञ्ज काठमाडौं र जलेश्वर लोहारपटि सडकको निर्माणको ठेक्का लिइ काम पूरा नगरेको भलेचा इण्डिया अरनिको निर्माण कम्पनी प्रालि जेभीको नाम गृह मन्त्रालयमा पठाइएको जिल्ला प्रशासन कार्यालय महोत्तरीले जनाएको छ।
त्यस्तै जिल्ला प्राविधिक कार्यालय तर्फ मटिहानी पिपरा सडक निर्माणको ठेक्का लिई म्याद गुज्रीसक्दा समेत काम नगरेको ढुकुछु कन्स्ट्रक्सन प्रालि, टिकुलिया बनौटा मधेपुरा सडकको रोशन कन्स्ट्रक्सन, भुतहा खोला बक्सपुलको ईलाईट कन्स्ट्रक्सन प्रा.लि. र रूपनी खोला बक्स पुलका बाम्ती निर्माण सेवा तथा श्री नरसिंह जेभिको नाम कारवाहीका लागि गृह मन्त्रालयमा पठाइएको जिल्ला प्रशासन कार्यालय महोत्तरीले जनाएको छ।
प्रमुख जिल्ला अधिकारीले गृह मन्त्रालयको निर्देशन अनुसार ठेक्का लिई काम पूरा नगर्ने र अटेर गर्ने ठेक्केदार कम्पनिलाई जिल्ला प्रशासनमा बोलाएर छलफल गरेर काम सम्पन्न गराउन प्रयास गरिनेछ। छलफलपश्चात पनि अटेर गरी बस्ने ठेकेदार कम्पनीलाई मन्त्रालयकै निर्देशनअनुसार कारबाही गरिने प्रमुख जिल्ला अधिकारी श्रेष्ठले बताए।
उनका अनुसार स्थानीय तहमा काम गर्दा कुनै समस्या परे हामी सहजीकरण गछौं तर तोकिएकै समयमा काम सम्पन्न हुनुपर्यो। प्रजिअ श्रेष्ठले निर्माण कम्पनीमात्रै होइन उपभोक्ता समितिलाई पनि हामीले निगरानी गरिरहेका बताए । उनले समयमै काम सम्पन्न नगर्ने, निर्माणमा खेलवाड गर्ने कम्पनी र ठेकेदारको नाम गृह मन्त्रालयमा पठाइएको जानकारी दिए।
जनताको मर्म अनुसार काम नगरी मनपरी निर्माण सामाग्रीको प्रयोग गर्ने र विभिन्न बाहना बनाउँदै काम ठग्ने ठेकेदारको पहिचान गर्न लागेको हो। ठेकेदारको लापरबाही र ढिला सुस्तीले योजना प्रभावित भएको थाहा पाउने बित्तिकै कडा कार्वाही गर्ने तयारी प्रशासनबाट भइरहेको छ।
स्रोतका अनुसार अधिकांश ठेकेदार कम्पन्नीले ठेकका लिएर केही कमिशनमा सहायक ठेकेदार( पेटी कन्ट्टयाक्ट ) लाई ठेकका दिने प्रवृति छ ।