महोत्तरीको औरही नगरपालिका १ का सन्तोष चौधरीकी दुधे बालिकाको अपहरणपछि हत्या गर्नेलाई प्रहरीले पक्राउ नगरेको भन्दै स्थानीयले विरोध गरेको छन्।
औरही नगरपालिकाको वडा नं १ स्थित औरही बजारमा किराना पसल चलाउँदै आएका चौधरीकी आठ महिने छोरी सोनालिकाको गत आइतबार अपहरणपछि हत्या भएको थियो।
घटना भएको तीन दिन भइसक्दा पनि अपराधी पक्राउ गर्न नसकेको भन्दै स्थानीयले बर्दिबास-जलेश्वर सडकमा सवारी आवागमन अवरुद्ध पारी आन्दोलन गरेका थिए।
उनीहरुले अपहरणकारी र हत्यारालाई तत्काल पक्राउ गरी कारबाहीको दायरामा ल्याउन माग गर्दै प्रदर्शन गरेका हुन्।
घटनाको विरोधमा स्थानीयले बिहानैदेखि औरही बजारसमेत बन्द गरेका छन्। बजार, पसल, शिक्षण संस्थासमेत बन्द भएका छन्।
बन्दका कारण बर्दिबास–जलेश्व औरही सडक अवरुद्ध भएको छ।
स्थानीयले सडकमा टायर बाली प्रदर्शन गरिरहेका छन्। तत्काल दोषी पत्ता लगाइ कारबाही र पीडितलाई उचित क्षतिपूर्ति, हत्यारालाई पक्राउ र छानबिन समिति गठन गर्नुपर्ने जस्ता माग राखी स्थानीयले बजार बन्द गराएका हुन्।
औरहीका व्यापारी, बुद्धिजीवि, विद्यार्थी, समाजसेवी एवं सर्वसाधारण नागरिक समाजका सयौं महिला पुरूषहरू आन्दोलनमा सहभागी थिए।
उनीहरूले बालिका बलात्कारी एवम् हत्यारालाई पक्राउ नगरेसम्म संघर्षका कार्यक्रम यथावत राख्ने चेतावनीसमेत दिएका छन्।
चक्का जामका कारण जलेश्वर–बर्दिबास सडकखण्डको औरही बजारको दुवैतिर सयौं बस, ट्रक, जीप, कार, मोटरसाईकल अलपत्र परेका छन् भने हजारौ यात्रु अलपत्र परेका छन्।
आइतबार साँझ चौधरीकी ८ महिने छोरीलाई पसलमा आमासँगै रहेको बेला भंगाहा सीतापुर ६ जमुनियाका २५ वर्षीय भरत साहले खेलाउने बहानामा अपहरण गरी लगेका थिए।
सोमबार बालिकाको शव औरही गाउँभन्दा पूर्व खेतमा भेटिएको थियो ।
फरार साहको खोजीका भइरहेको महोत्तरीका एसपी ईश्वर कार्कीले जानकारी दिए।
कार्कीका अनुसार ईलाका प्रहरी कार्यालय बर्दिवासका प्रहरी नायव उपरीक्षक नकुल पोखरेल, जिल्ला प्रहरी कार्यालय महोत्तरीका प्रहरी नायव उपरीक्षक खगेन्द्र बहादर खडका र ईलाका प्रहरी कार्यालय गौशालाका प्रहरी निरीक्षक भोला भट्टको कमाण्डमा १ सय भन्दा बढी प्रहरी परिचालन गरिएको छ।
एसपी कार्कीले भने चाँडै अपराधीलाई पक्राउ गरेर कारबाहीको दायरामा ल्याउने बताएका छन्।
‘हामी अपराधीलाई पक्राउ गरेर कारबाही गर्न प्रतिवद्ध छौं। तर, यसरी बन्द, हड्तालमा स्थानीय उत्रिएपछि अपरfधीलाई नियन्त्रणमा लिन अप्ठ्यारो हुन्छ,’ उनले भने,‘ यसका लागि हामीले सादा पोशाकका प्रहरीसमेत नेपाल-भारत सीमा तथा छिमेकी जिल्लामा खटाइसकिएका छौ।’
