अफगानिस्तानको काबुलमा शनिबार राति एक विवाह समारोहमा आत्मघाती हमला हुँदा ६३ जनाको मृत्यु भएको छ भने झन्डै २ सय जना घाइते भएका छन्। मारिनेमा धेरै महिला र बालबालिका रहेका छन्।
कतारको राजधानी दोहामा अमेरिका र तालिवान विद्रोहीका प्रतिनिधिबीच वार्ता जारी रहेका बेला काबुलमा पछिल्लो विस्फोट भएको हो।
अमेरिकाले आफ्ना सेना अफगानिस्तानबाट फिर्ता गर्नका लागि अफगान सरकार र तालिवानबीच शान्ति वार्ताको प्रयास गरिरहेको हो। त्यसका लागि विभिन्न चरणमा छलफलहरू भएका छन्।
तालिवानले भने हमलाको जिम्मेवारी लिएको छैन।
शनिबारको विस्फोटले अफगानिस्तानमा शान्ति सुव्यवस्था हुने आशामा तुषारापात भएको सञ्चारमाध्यमहरूले जनाएका छन्।
काबुलमा पछिल्लो समय ठूला पार्टी हलमा विवाह समारोह गर्ने चलन चलेको छ। विवाह समारोह गर्ने यस्ता हलको व्यापार ह्वात्तै बढेको छ।
आतंकवादीहरूले पनि त्यस्ता समारोहलाई नै लक्षित गर्ने गरेका छन्। गत नोभेम्बरमा भएको त्यस्तै हमलामा परी ४० जनाको मृत्यु भएको थियो।