नेपाली कांग्रेसले सीमा विवाद मिलाउने जिम्मेवारी प्रधानमन्त्री केपी शर्मा ओलीको भएको बताएको छ।
शनिबार सर्वपक्षीय भेलामा पार्टीका तर्फबाट सुझाव दिइएको उल्लेख गर्दै कांग्रेस प्रवक्ता विश्वप्रकाश शर्माले सरकारको भूमिका नजिकबाट निहालिरहेको बताएका हुन्।
‘सीमा विवाद हल गर्ने जिम्मेवारी अब प्रधानमन्त्रीको हो। सर्वपक्षीय भेलामा सबैले सुझाव दिइसकेका छौं,’ पार्टी कार्यालयमा मंगलबार पत्रकार सम्मेलन गर्दै प्रवक्ता शर्माले भने, ‘अब बल प्रधानमन्त्रीको खुट्टामा छ। सीमा विवाद हल गर्ने विषयमा सरकारको भूमिका नियालिरहेका छौं।’
उनले प्रतिपक्षी दल कांग्रेसले सीमा विवाद हल गर्न र अतिक्रमित भूमि फिर्ता ल्याउने विषयमा सरकारले गर्ने हरेक पहललाई सघाउने पनि बताए।
‘सीमा विवाद हल गर्न सरकारले परिणाममुखी पहल गरोस्,’ उनले भने।
कांग्रेसले डडेल्धुरामा अनसन बसिराखेका डाक्टर गोविन्द केसीको जीवन रक्षा गर्न पनि सरकारसँग माग गरेको छ।
‘डाक्टर केसीले उठाएका विषय हल गर्न सरकारले वार्ता टोली गठन गरोस्,’ शर्माले भने, ‘जीवन रक्षा गर्ने जिम्मेवारी पनि सरकारकै हो।’
डाक्टर केसी नौ दिनदेखि अनसनमा छन्।
डाक्टर केसीले उठाएका माग हल गर्न र चिकित्सा शिक्षा पढिराखेका विद्यार्थीका मागहरू पूरा गर्न पनि कांग्रेसले सरकारको ध्यानाकर्षण गराएको छ।
‘समस्याको विवेकसम्मत हल खोज्न र तनावमुक्त वातावरणमा विद्यार्थीलाई पढाउन हामी आग्रह गर्छौं,’ उनले भने।
कांग्रेसले उपनिर्वाचनका लागि आचारसंहिताअनुसार नै अघि बढ्ने प्रतिवद्धता पनि जनाएको छ।
सरकारले प्रदेश प्रमुख परिवर्तन गरी नयाँ नियुक्त गरेकोमा पनि आचारसंहिता उल्लंघन भएको उसको दाबी छ।
यद्यपी निर्वाचन आयोगले प्रदेश प्रमुख नियुक्तिमा आचारसंहिता उल्लंघन नभएको बताइसकेको छ।
