प्रदेश-२ को भौतिक पूर्वाधार राज्यमन्त्री डिम्पल झाको राजीनामा फिर्ता भएको छ। राजीनामा फिर्ता भएपछि राज्यमन्त्री झाले आजै मन्त्रालय सम्हालेकी छन्।
प्रदेश सरकारसँग असन्तुष्टि जनाउँदै माघ १४ गते उनले राजीनामा दिएकी थिइन्।
राजपाको अध्यक्ष मण्डलले राजीनामा फिर्ता लिन आग्रह गरेपछि आफूले राजीनामा फिर्ता लिएको र मन्त्रालयमा पुगेर काम गर्न सुरू गरेको बताइन्।
उनले भनिन्, ‘पार्टीले नै आफूलाई प्रदेशसभा सदस्य र राज्यमन्त्री बनाएकाले पार्टीको आदेशलाई अस्वीकार गर्न सक्दिनँ।’
राज्यमन्त्री झाको राजीनामापछि प्रदेश-२ मा सरकार परिवर्तन हुने हल्ला समेत चलेको थियो।
राजपा अध्यक्ष मण्डलका सदस्यहरू राजेन्द्र महतो, शरदसिंह भण्डारी र राजकिशोर यादवको भारत भ्रमण र राज्यमन्त्रीको राजीनामा फिर्तापछि अहिले सरकार परिवर्तनको सम्भावना समेत न्यून भएको विश्लेषकहरू बताउँछन्।
मिडियाले सरकार परिवर्तनको हल्ला चलाएको राज्यमन्त्री झाले आरोप लगाइन्।
प्रदेश सरकारले कुनै कार्यक्रम गर्दा राजपाका मन्त्रीहरूलाई महत्व नदिएकोले उनले आरोप लगाएकी थिइन्।
‘गठबन्धनको सरकार रहेकाले आफूहरूलाई अलग राखेर गठबन्धन चलाउन सकिँदैन’, उनले भनिन्।