पोखराको नयाँ बजार र न्युरोडको बीचमा पर्ने दमकल मार्गका महिलाहरू जुटेर तीन महिना अघिदेखि खानेपानी संस्थान धाउँदै आएका छन्।
पानी माग्न गएका उनीहरूलाई कर्मचारीहरूले कार्यालय भित्रकै कहिले कुन कोठा त कहिले कुन कोठामा जान भनेर हैरान गर्छन्। तर ति कोठा पुग्दा काम गरिदिने कर्मचारी उनीहरूले भेट्दैनन् ।
बल्ल तल्ल संस्थानका भेटिएका कर्मचारीले उनीहरूको गुनासो सुनेपछि संस्थानकै पानी वितरण गर्ने अर्का कर्मचारीलाई फोन गर्छ। अनि महिलाहरूतिर फर्केर भन्छ- घरमा पानी आइसक्यो,जानुस्।
महिलाहरूको समुह घर फर्कन्छन्, तर पानी आएको हुँदैन ।
दमकल मार्गमा बस्ने जुनु जिसी र उनको परिवारबाट मात्र संस्थान धाउन समुहसहित ४ पटक गइसके।
‘हाम्रो परिवारबाट मात्र ४ पटक संस्थानमा गयौं, पानी पठाइदिएनन्,’ उनले भनिन्।
उनका अनुसार टोलबाट ५ पटक महिलाको समुह पानी माग्न संस्थानको पोखरा स्थित कार्यालय पुगेका थिए।
पछिल्लो पटक चैत ५ गते पनि पानी माग्न उनीहरु संस्थान पुगेका थिए। ‘पानी नै नआउने भएपछि के जानु,' उनले भनिन्, 'अचेल त जानै छाडिदियौं,' उनले भनिन्।
कोरोना भाइरस महामारी नियन्त्रण गर्न सरकारले लकडाउन गरेको छ। सरकार स्वास्थ्यकर्मीले निरन्तर हात धुन र सरसफाइमा ध्यान दिन भनेका छन्। तर लकडाउनकै दिनदेखि पोखराका दमकल मार्ग, नयाँबजार, न्युरोड लगायतका क्षेत्रमा पानी आउनै छाड्यो।
नयाँ बजार निवासी सन्देश पौडेलले हात धुन पनि पानी नपाएको बताए। उनीहरुले ५ सय रूपैयाँ तिरेर एक ट्याङ्कर पानी मगाउने र त्यही फारो गरेर चलाएको बताए।
दमकल मार्गमा बस्नेहरुले त ३ महिनादेखि नै ट्याङ्करको पानी प्रयोग गर्छन्।
‘एक दिन विराएर ट्याङ्करबाट पानी भर्छौ,' दमकल मार्गकी जिसीले भनिन्,'खानका लागि जारको पानी किन्छौं।’
पोखरामा अहिले वितरण भइरहेको पानी पिउनका लागि योग्य छैन। तर धेरै श्रमिक परिवार यही पानी पिउँछन्। संस्थानले वितरण गरेको पानी अधिकांश पोखरेलीले हात धुन, नुहाउन, भाँडा र लुगा धुनका लागि प्रयोग गर्छन्।
‘पानी नै नआएपछि के गर्नु,' जिसीले भनिन्,'हात धुन पनि हामीसँग पानी छैन।’
नयाँबजारबाट दमकल मार्गमा जाने बाटोमै पोखरा महानगरको शहरी स्वास्थ्य प्रवर्द्ध केन्द्र रहेको छ। यस केन्द्रमा पनि अहिले पानी नआएको स्वास्थ्यकर्मीहरूले बताए। उनीहरूले पनि ट्याङ्कर र जारको पानी प्रयोग गरिरहेका छन्।
खानेपानी संस्थानका प्रमुख आषिश कार्की भने पोखराका कुनैपनि क्षेत्रमा पानी नरोकेको दाबी गर्छन्। शुक्रबार विहान सेतोपाटीसँग कुरा गर्दै कार्कीले पानी सबैतिर नियमित भएको र कहीँ पनि प्राविधिक समस्या नभएको बताए।
‘दमकल मार्ग र नयाँबजारमा के भएको रहेछ म हेर्छु,' उनले भने, 'प्राविधिक पठाएर समस्याको समाधान गर्छु।’
उनले विहान १० बजे नै प्राविधिक पठाएर समस्याको समाधान गर्ने बताए । तर अहिलेसम्म प्राविधिक र पानी दुबै नआएको पीडितहरूले बताएका छन्।