नेपाली कांग्रेसका केन्द्रीय सदस्य शेखर कोइरालाले प्रधानमन्त्री केपी शर्मा ओलीले आफ्ना सूचना प्रविधि सल्लाहकारलाई पदबाट बर्खास्त गर्नुपर्ने बताएका छन्।
सूचना प्रविधि सल्लाहकार असगर अलिको स्वामित्वमा रहेको सिरान टेक्नोलोजीले काठमाडौं प्रेस अनलाइनबाट समाचार हटाएको भन्दै उक्त घटना प्रेस तथा अभिव्यक्ति स्वतन्त्रता हनन् र निकृष्ट नमूना भएको शुक्रबार विज्ञप्ति निकालेर कोइरालाले उल्लेख गरेका हुन्।
‘संसारमै नहुने यस्तो विरलै घटना प्रेस र अभिव्यक्ति स्वतन्त्रता हननको उच्चतम र निकृष्ट नमूना हो,’ कोइरालाले निकालेको विज्ञप्तिमा भनिएको छ, ‘संसारमा कहीँकतै पनि प्रकाशित समाचारलाई लिएर विमति हुँदैमा वेभ डेभलपरले यसरी समाचार हटाउन पाउँदैनन्।’
प्रधानमन्त्रीले तुरून्तै अलिलाई पदबाट हटाउनुपर्ने उनले बताएका हुन्। ‘प्रधानमन्त्रीले आफ्ना ती सूचना प्रविधि सल्लाहकारलाई तुरून्तै पदबाट बर्खास्त गर्नुपर्छ। यो घटनामा संलग्न दोषीमाथि कारवाही गरिनुपर्छ,’ कोइरालाले भनेका छन्।
सिरान टेक्नोलोजीले समाचार हटाएकोप्रति माफी मागिसकेको प्रसंगमा सरकारले अब कानुनी कारवाही गर्नुपर्ने उनले बताए।
‘भोलि सूचना प्रविधिको पहुँच दुरूपयोग गरी अलि संगल्न कम्पनीले निजी बैंकमा रहेको अर्बौं रूपैंयाँ तलमाथि गरे त्यसको परिणाम के हुन्छ?’ उनले प्रश्न गरेका छन्।
समाचार साइट ह्याक गर्नेको हातमा २२ वटा वाणिज्य बैंक र २६ वटा वित्तिय संस्थाको गेटवे हुनुले लाखौं नेपालीले आफ्नो दु:ख, परिश्रम गरेर संकलन गरेको अर्बौं रूपैंयाँको जोखिम बढाएको उनले उल्लेख गरेका छन्।
