प्रमुख प्रतिपक्षी नेपाली कांग्रेसका सभापति शेरबहादुर देउवाले कोरोना संक्रमणको संख्या वृद्धि भइरहे पनि केन्द्र र प्रदेश सरकारले प्रभावकारी काम गर्न नसकेको बताएका छन्।
कोरोना रोकथाम तथा नियन्त्रणमा सरकारले गरेका कामकारवाही र कांग्रेसको भूमिकाबारे प्रदेश नम्बर २ का नेता, कार्यकर्ता सहभागी जुम बैठकमा देउवाले कोरोना नियन्त्रणमा सरकारले चित्तबुझ्दो काम नगरेको बताए।
आइतबार भएको बैठकमा देउवाले कोरोनाबाट आफू बच्ने र अरूलाई बचाउनुपर्ने बताए।
‘कोरोनाबाट आफू बच्ने र अरूलाई बचाउने हो,’ उनले भने, ‘सचेतना वृद्धि गर्नुपर्यो। मास्क लगाउनुपर्छ। सामाजिक दूरी कायम गर्नुपर्यो र साबुनपानीले हात धुनुपर्छ भनेर सचेतना फैलाउनुपर्छ।’
कोरोना रोकथाम तथा नियन्त्रणमा सरकारले प्रभावकारी काम नगरेको उनले आरोप लगाए। उनले प्रदेश नम्बर २ मा नाका भएर पनि कोरोना संक्रमण बढेको हुनसक्ने बताए। संघीय राजधानी काठमाडौंमा पनि संक्रमित संख्या वृद्धि भइरहेको उनको भनाइ छ।
कांग्रेसका नेता, कार्यकर्ताहरूमा पनि कोरोना संक्रमण देखिएको र केहि निको भइसकेको उल्लेख गरेका देउवाले कोरोनाको औषधि अहिलेसम्म नभए पनि इम्युनिटी बढाउनुपर्नेमा ध्यान दिन आग्रह गरेका छन्।
‘गुर्जो, तातोपानी खाने गरेमा इम्युनिटी पावर वृद्धि गर्ला। तर कोरोनाको औषधि गुर्जो हो भन्ने पुष्टि भइसकेको छैन,’ उनले भने, ‘यसले इम्युनिटी त बढाउँछ होला।’