अदालत अवहेलना मुद्दामा चार जना पूर्वप्रधानन्यायाधीशहरू लिखित जवाफ दिन सोमबार सर्वोच्च अदालत पुगे। यसअघि सर्वोच्चले पूर्वप्रधान्यायाधीश मीनबहादुर रायमाझी, अनुपराज शर्मा, कल्याण श्रेष्ण, सुशीला कार्कीलाई आफैं अदालतमा उपस्थित हुन आदेश दिएको थियो।
पूर्वप्रधानन्यायाधीश अनुपराज शर्माले आफ्नो छुट्टै लिखित जवाफ पेस गरे भने बाँकी तीन जनाले संयुक्त लिखित जवाफ दिए। सर्वोच्च अदालतले उनीहरूलाई सात दिनभित्र लिखित जवाफ दिन म्याद भने तामेल गरेको थिएन।
अधिवक्ता लोचन भट्टराई र धनजीत बस्नेतले पूर्वप्रधानन्यायाधीशहरू मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीविरूद्ध हालेको अपहेलना मुद्दा पेश गरेका थिए। चार पूर्वप्रधानन्यायाधीशले पुस २४ गते विज्ञप्ति जारी गर्दै प्रधानमन्त्री केपी शर्मा ओलीको संसद विघटन निर्णयलाई असंवैधानिक भनेका थिए।
अदालतमा लिखित जवाफ दिएपछि पूर्वप्रधानन्यायाधीश कल्याण श्रेष्ठले आफूहरूले यो प्रक्रियाको सम्मान गर्दै अदालत गएको बताएका छन्।
उनले भने, 'अहिलेसम्म दुनियाँलाई हामीले न्यायकर्ताका रूपमा हेर्यौं होला, अहिल हामी आफैं न्याय याचक भएर जानुपर्ने अवस्था आयो। तर हामी नागरिकको अधिकार र दायित्व दुवै हुन्छ। हामीउपर कसैले सिकायत गर्न पाउने नै भयो। हामी यसको सम्मान गर्छौं। त्यही सम्मान गरेर हामी गएका हौं। बाँकी कुरा अदालती प्रक्रियामा यसको यथोचित मूल्यांकन हुने नै छ। यसको कटाक्ष गर्नुपर्ने कुनै जरूरी छैन।'
त्यस्तै पूर्वप्रधानन्यायाधीश मीनबहादुर रायमाझीले आफूहरूको कर्मको जन्मस्थल नै अदालत भएको र कसैले पनि आफ्नो जन्मस्थलको अवहेलना नगर्ने बताए। तर यो प्रक्रिया र आदेशको अवज्ञा आफूहरूले गर्ने सोच्दा पनि नसोच्ने प्रतिक्रिया दिए।
पूर्वप्रधानन्यायाधीश सुशीला कार्कीले पनि यो प्रक्रियाले आफूलाई खासै फरक नपारेको प्रतिक्रिया दिइन्।
हेर्नुस् सर्वोच्च अदालतमा लिखित जवाफ दिएपछि पूर्वप्रधानन्यायाधीशहरूको प्रतिक्रियाः