प्रमुख प्रतिपक्ष दल नेपाली कांग्रेसले सहकारी प्रकरणमा संसदीय समिति बनाएर छानबिन गर्न प्रधानमन्त्री सकारात्मक भएको बताएको छ।
आइतबार प्रधानमन्त्रीको सरकारी निवास बालुवाटारको बैठकपछि सहकारी प्रकरणमा संसदीय छानबिन समिति बनाउन प्रधानमन्त्री प्रचण्ड सकारात्मक भएको कांग्रेसका प्रमुख सचेतक रमेश लेखकले बताए।
छलफलपछि सञ्चारकर्मीहरुसँगको कुराकानीमा लेखकले प्रधानमन्त्रीसँग नेपाली काँग्रेसले सहकारी प्रकरणमा उपप्रधान एवं गृहमन्त्री रवि लामिछानेमाथि संसदीय छानबिन समिति बनाएर छानबिन हुनुपर्ने माग राखेको र प्रधानमन्त्री सो विषयमा सकारात्मक भएको बताएका हुन्।
‘हामीले सहकारी सन्दर्भमा जे कुरा उठाउँदै आएका छौं, संसदीय छानबिन समिति गठन गर्ने कुराका बारेमा हामीले आफ्ना कुरा राखेका छौं। प्रधानमन्त्रीज्यूसँग यो बारेमा कुराकानी भयो,’ उनले भने, ‘हामीले आफ्ना कुरा राखेका छौं। प्रधानमन्त्रीजीले सकारात्मक ढंगले लिनुभएको छ। सकारात्मक कुरा नै छ। हामीले हाम्रो कुरालाई यथावत् राखेका छौं। प्रधानमन्त्रीजीले सकारात्मक कुरा गर्नुभएको छ।’
उनले सोमबार बस्ने संसदीय दलको बैठकले थप निर्णय गर्ने पनि बताए।
भिडिओः
