काठमाडौंस्थित शिक्षण अस्पताल र नुवाकोटको त्रिशूली अस्पतालमा रहेका कोरोना संक्रमित र उनीहरूका परिवारका सदस्य तथा आफन्तलाई नि:शुल्क खानाको व्यवस्थापन गरिएको छ।
नुवाकोट कांग्रेस जिल्ला कार्यसमितिको समन्वयमा यशोदादेवी-भगवान सिंह केसी मेमोरियल ट्रष्ट ॐ आदी फाउन्डेसनको तर्फबाट आइतबारदेखि नि:शुल्क रूपमा खाना उपलब्ध गराइएको हो।
कोरोनाका बिरामीको उपचार, परीक्षण तथा उपचारमा संलग्न रहेका स्वास्थ्यकर्मीलाई पनि खानाको व्यवस्थापन गरिएको नुवाकोट कांग्रेसका सभापति जगदीश्वरनरसिंह केसीले सेतोपाटीलाई बताए।
उनकाअनुसार नियमित रूपमा अस्पतालमै खानाको व्यवस्थापन गरिएको छ। अस्पतालभित्रै रहेको क्यान्टिनमा पौष्टिक खानाको व्यवस्थापन मिलाइएको र त्यसवापत साप्ताहिक रूपमा खर्च उपलब्ध गराइने केसीको भनाइ छ।
यस्तै कांग्रेस नुवाकोटले पार्टी कार्यालय भवन आइसोलेन वार्ड बनाउन दिने निर्णय यसअघि नै गरिसकेको छ।