जनमत पार्टीनिकट विद्यार्थीले धनुषामा एक विद्यालयका प्रधानाध्यापकलाई ‘जनकारबाही’ भन्दै हातपात गरेका छन्।
सबैला नगरपालिकाको रघुनाथपुरस्थित फकिर चन्द उच्च माध्यमिक विद्यालय बरकुर्वाका प्रधानाध्यापक वैजु साहलाई स्थानीय विद्यार्थीले हातपात गर्दै मोसो दलेका हुन्।
धनुषाका डिएसपी जितेन्द्र बस्नेतका अनुसार साहलाई विद्यालय जाँदै गरेको अवस्थामा विद्यार्थीहरूले चप्पलले कुटेका थिए।
विद्यार्थीले लछारपछार गर्दै हातपात गरेपछि प्रधानाध्यापक साह मोटरसाइकलमै भागेका थिए।
चार दिनदेखि आन्दोलनरत विद्यार्थीको माग पूरा नगरेको भन्दै उनीहरूले प्रधानाध्यापकमाथि दुर्व्यवहार गरेका हुन्।
नियमित पठनपाठन हुनुपर्ने र शिक्षकको व्यवस्थापन हुनुपर्ने, विभिन्न शुल्कको नाममा लिइएको रकमको बिल विद्यार्थीहरूले पाउनु पर्ने, कक्षा ११ र १२ का विद्यार्थीहरूले पुस्तक पाउनु पर्ने, विद्यालयका नाममा आएका सामग्री विद्यालयमै राख्नुपर्ने र विद्यालय सुधारका लागि सरोकारवालाको बृहत् भेला गरी अन्य विषयमा निर्णय लिनुपर्ने मागसहित विद्यार्थी आन्दोलनमा उत्रिएका हुन्।
यसअघि सिके राउतका कार्यकर्ताले जनकारबाही भन्दै खानेपानी तथा ढल निकास कार्यालय जनकपुरका निमित्त प्रमुख राजेश कुशवाहालाई नियनन्त्रणमा लिई अर्धनग्न गदी जनकपुर परिक्रमा गराएका थिए।
सो घटनामा संलग्न रहेको आरोपमा जनमत पार्टीका १७ जना कार्यकर्तामाथि मुद्दा दर्ता गरेर कारबाही प्रक्रिया अघि बढाइएको छ।
