नेपाली कांग्रेसका पूर्वमहामन्त्री प्रकाशमान सिंहले १४ औं महाधिवेशनमा आफू सभापतिको उम्मेदवार बन्न तयार रहेको बताएका छन्।
कांग्रेसले मंसिरमा १४ औं महाधिवेशन गर्दैछ।
वडादेखि केन्द्रसम्म पार्टीलाई बलियो बनाउन र लोकतन्त्र रक्षाका लागि पनि अब नेतृत्व परिवर्तनको बेला आएको सिंहले बताए।
‘म सभापतिको उम्मेदवार बन्न तयार छु। पार्टीलाई वडादेखि नै शक्तिशाली बनाउनुछ,’ कीर्तिपुर कांग्रेस नगर समितिले आज गरेको कार्यक्रममा उनले भने, ‘जनताको नजरबाट गिरिसकेका नेतालाई अगाडि राखेर जतिसक्दो राम्रो काम गरे पनि जनताले पत्याउँदैनन्।’
उनले विगतमा आफू चुनाव लड्छु भन्दा कसैले नपत्याएको तर भोट गनेपछि क्षमता देखेकोसमेत बताए। आफूलाई देशैभरका नेता तथा कार्यकर्ताको साथ रहने विश्वास उनको थियो।
उनले १३ औं महाधिवेशनपछि पार्टी कमजोर भएको पनि बताए।
