जनकपुरका स्थानीय जनप्रतिनिधिले मेयरको घरअघि फोहोर फाल्दै विरोध प्रदर्शन गरेका छन्।
चाडपर्वको अवसरमा समेत जनकपुरधाम उपमहानगरपालिकाले सरसफाई गर्नमा ध्यान नदिएको भन्दै मेयर लालकिसोर साहको घरअघि स्थानीय जनप्रतिनिधिले फोहोर फालेर बिरोध गरेका हुन्।
उनीहरुले मेयर साहलाई पटक–पटक फोहोर व्यवस्थापनको लागि आग्रह गर्दासमेत कुनै चासो नदिएको आरोप लगाएका छन्। शुभ दीपावली नजिकिँदै फोहोर व्यवस्थापनमा चासो नदेखाएको भन्दै केही वडाध्यक्षहरुले नगरप्रमुख साहलाई कालोमोसो दल्ने चेतावनी समेत दिएका छन्।
वडा नम्बर–७ का वडाध्यक्ष जानकीराम साहले उपमहानगरलाई दुर्गन्धित बनाउने गरी थुपारिएका फोहोर व्यवस्थापनलाई मेयर साहले बेवास्ता गरेको भन्दै मेयर साहलाई कालोमासो दल्ने चेतावनी दिए।
वडा नम्बर–१ का वडाध्यक्ष शत्रुधन साह, वडा नम्बर–३ का वडाध्यक्ष दिपेन्द्र साह, वडा नम्बर–४ का वडाध्यक्ष सुदर्शन सिंह र वडा नम्बर–७ का वडाध्यक्ष जानकीराम साहलगायकाहरुले जनकपुरधाम उपमहानगरपालिकाको कार्यालय अगाडि धर्ना समेत दिएका छन् ।
‘हामीले यो भन्दा पहिला पनि धेरै पटक फोहोर व्यवस्थापन हुनुपर्छ भनेका थियौँ, तर मेयर साबले फोहोर व्यवस्थापनका लागि कुनै चासो नै देखाउनु भएन, जनताप्रति उहाँले बेवास्ता गर्नुभयो, उपमहानगरलाई दुर्गन्धित बनाउने गरी थुपारिएका फोहोर व्यवस्थापनलाई मेयर साबले वास्ता नै गर्नुभएन’, वडाध्यक्ष साहले भने,‘फोहोर व्यवस्थापन हुनुपर्छ भनेर ल्याण्डफील्ड बनाउनुपर्छ भन्दै आएका छौँ, तपाईले नसके हामी वडाध्यक्षहरुको समूह बनाएर काम गर्छौं भन्दा पनि उहाँले मान्नुभएन, काम नगर्ने मेयर अनि गाली खाने हामी वडाध्यक्ष ? उहाँचाहीँ अहिले काठमाडौं घुम्न जाने चाडबाडको बेला, रमाइलो गर्ने ? अब हामी कालोमोसो दल्नसपर्छ भने त्यो पनि दल्नेछौँ ।’
प्रहरीले नगरप्रमुख साहको घर अगाडि फोहोर फाल्न नदिएपछि उनीहरुले उपमहानगरपालिकाको कार्यालय अगाडिको बाटो जाम गरेर धर्नामा बसेका थिए।
वडाध्यक्षहरुले फोहोर व्यवस्थापनका लागि चासो नदेखाएको, आफूहरुलाई ट्याक्टरसमेत उपलब्ध नगराएको र जनताप्रति बेवास्ता गरेको र आफू भ्रष्टाचारमा मात्र केन्द्रित बनेको आरोप लगाएका छन्।
जनकपुरधाम उपमहानगर भित्रका विभिन्न वडामा थुपारिएको फोहोर व्यवस्थापनमा असहयोग गरेको भन्दै नगरप्रमुख साहप्रति जनप्रतिनिधिहरु पनि आक्रोशित बनेका छन्।
जनप्रतिनिधिहरूले मेयर साहको घरअगाडि फोहोर थुपारेपछि उपमहानगरपालिकाका निमित्त प्रमुख कार्यकारी प्रमुख मेहीलाल यादवले तीन दिनभित्र फोहोरको समस्या समाधान गर्ने प्रतिवद्धता जनाएका छन्।
प्रत्येक वडामा थप १/१ ट्याक्टरका साथै सरसफाइका लागि १५/१५ जना सफाइ कर्मचारी पठाइने यादवले प्रतिवद्धता जनाएको वडाध्यक्ष साहले जानकारी दिए।
पछिल्लो समय महिनौदेखि सडक तथा सार्वजनिक स्थलबाट फोहोर नउठ्दा जनकपुर दुर्गन्धित बन्दै गएको छ । ल्याण्ड फिल्ड साइट अभावमा फोहोर व्यवस्थापन चुनौती बनेको उपमहानगरपालिकाले बताउँदै आएको छ ।
