संघीय संसदमा एक जनामात्रै सांसद रहेको राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले आइतबार चार जना प्रवक्ता र तीन जना सहप्रवक्ता मनोनित गरे।
पार्टीका आधिकारिक धारणा सार्वजनिक गर्न नेपालका पार्टीहरूले प्राय: एक जना प्रवक्ता तोक्ने गरेका छन्। संसदमा भएको प्रतिनिधित्वको हिसाबले राष्ट्रिय पार्टीको मान्यता पनि नपाएको राप्रपाले भने सात जना प्रवक्ता र सहप्रवक्ता बनाएपछि अहिले यो चर्चाको विषय बनेको छ।
कतिपयले 'सानो पार्टीले धेरै प्रवक्ता बनाएको' भनेका छन् भने केहीले सातमध्ये कसको बोलीलाई पार्टीको आधिकारिक धारणा मान्ने भनेर प्रश्न उठाएका छन्।
गत मंसिर १९ मा कमल थापालाई हराउँदै लिङ्देन राप्रपा अध्यक्ष निर्वाचित भएका थिए। पहिलो केन्द्रीय समिति बैठक फागुनमा बोलाएका लिङ्देनले त्यसअघि पदाधिकारी र विभागका प्रमुख तोकेका हुन्।
अध्यक्ष लिङ्देनले प्रवक्तामा झापाका भक्तिप्रसाद सिटौला, गोरखाका मोहन श्रेष्ठ, पाँचथरका सगुनसुन्दर लावती र मोरङका गोपाल दाहाललाई मनोनीत गरेका छन्।
यस्तै सहायक प्रवक्तामा अध्यक्ष लिङ्देनले दोलखाका प्रविनकुमार थोकर तामाङ, मोरङका दिनेशकुमार साह र कञ्चनपुरका पूर्णबहादुर चन्दलाई जिम्मेवारी दिएका हुन्।
लिङ्देनले उपाध्यक्ष, महामन्त्री, सहमहामन्त्री र सहायक महामन्त्री पनि मनोनीत गरेका छन्। उपाध्यक्षमा लमजुङका हेमजंग गुरूङ र सुर्खेतका मुकुन्दश्याम गिरी मनोनीत भएका हुन्।
महामन्त्रीमा ओखलढुंगाका राजेन्द्र गुरूङ र मोरङका प्रह्लादप्रसाद साह मनोनीत भए। सहमहामन्त्री सात जना मनोनीत भएका छन्।
बाराका मोहनप्रसाद यादव, कालिकोटका धनबहादुर बुढा, अछामका श्यामबहादुर शाही, काठमाडौंका प्रकाश रिमाल, भक्तपुरका रवीन्द्रप्रताप शाह, नुवाकोटका झनक प्याकुरेल र चितवनकी रीना गुरूङ सहमहामन्त्री भएका छन्।
अध्यक्ष लिङ्देनले छ जनालाई सहायक महामन्त्री बनाएका छन्।
जुम्लाका रमानन्द न्यौपाने, दोलखाका विजय खड्का, डोटीका प्रेम बलायर, बाँकेका ऋषिराम देवकोटा, रूपन्देहीका ताहिर अलि र नुवाकोटका दीपककुमार राई सहायक महामन्त्री मनोनीत भएका छन्।
आर्थिक विभाग प्रमुखमा भक्तपुरका दिनेश श्रेष्ठलगायत ६ विभाग प्रमुख तोकिएका छन् भने जुम्लाका रमानन्द न्यौपाने केन्द्रीय सचिवालय सदस्य सदस्य सचिव मनोनीत भएका छन्।
राप्रपा महाधिवेशनमा अध्यक्षमा लिङ्देन जिते पनि पदाधिकारीमा भने कमल थापा पक्षकै नेताको बर्चश्व थियो। चार उपाध्यक्षमध्ये तीन जना थापा पक्षले जितेका थिए भने तीन महामन्त्रीमा दुई जना थापा पक्षकैले जितेका थिए।
निर्वाचित पदाधिकारीमा आफू पक्षका धेरै नभएकोले अध्यक्ष लिङ्देनले पहिलो केन्द्रीय समिति बैठक बस्नुअगाडि नै आफू पक्षका नेताहरूलाई पदाधिकारी मनोनीत गरेका छन्। १९९ केन्द्रीय समितिमा २० जना मनोनीत हुन बाँकी छन्।
निर्वाचन आयोगले पार्टी विधानबाट 'राजसंस्था र हिन्दु राष्ट्र' हटाउन भनेपछि योलगायत विभिन्न विषयमा छलफल गर्न अध्यक्ष लिङ्देनले केन्द्रीय समिति बैठक राख्न लागेका हुन्। आयोगले पठाएको पत्रबारे नै केन्द्रीय समितिमा छलफल गर्ने तयारी छ।
पूर्वअध्यक्ष कमल थापाले महाधिवेशनमा 'निर्मल निवास' ले हस्तक्षेप गरेको दाबीसहित छानबिन गर्न माग गरिरहे पनि यो एजेन्डामा छलफल हुन्छ कि हुँदैन खुलेको छैन। तर थापा पक्षबाटै उपाध्यक्ष र महामन्त्री जितेका नेताहरू रहेकोले यो एजेन्डा केन्द्रीय समितिमा उठ्न सक्छ।
ती एजेन्डा उठेमा 'डिफेन्स' गर्न अध्यक्ष लिङ्देनले आफूनिकट नेता पदाधिकारीमा मनोनीत गर्दै थप सहज बनाएका छन्।
विधानकै व्यवस्थाअनुसार अध्यक्ष लिङ्देनले पदाधिकारीहरू मनोनीत गरेको प्रवक्ता मोहन श्रेष्ठ बताउँछन्।
‘विधानमै तोकिएअनुसार पदाधिकारी बनाइएको छ,’ श्रेष्ठले भने, ‘कमल थापाले महाधिवेशनबाट आफू अध्यक्ष जित्छु भनेर नेता व्यवस्थापन गर्न यति धेरै पद रहने गरी विधान बनाउनु भयो। अध्यक्ष लिङ्देनले त त्यही विधान कार्यान्वयन गर्नुभएको हो।’
थापा नै अध्यक्ष हुँदा बनाइएको विधान लिङ्देन अध्यक्ष बनेपछि कार्यान्वयनमा ल्याएको श्रेष्ठ बताउँछन्।
‘विधानमै प्रवक्ताहरू र सहायक प्रवक्ताहरू भनेर लेखिएको हुनाले चार प्रवक्ता र तीन सहायक प्रवक्ता मनोनीत गरिएको हो,’ उनले भने, ‘पार्टीका गतिविधिबारे प्रवक्ता र सहायक प्रवक्ताका धारणा आधिकारिक हुन्छन्।’
प्रवक्ता रहेकाहरू केहीलाई प्रचार विभाग प्रमुखलगायतको जिम्मेवारी दिने तयारी पनि राप्रपाको छ।
राप्रपाले यसपालि अध्यक्ष, केही उपाध्यक्ष र केही महामन्त्री निर्वाचनबाट ल्याएको थियो।
‘विधानमा आठ उपाध्यक्ष हुने व्यवस्था छ। एक महिलासहित चार जना निर्वाचनबाट आएका हुन्, चार जना भने मनोनीत हुन्,’ उनले भने, ‘छ महामन्त्रीमध्ये एक महिलासहित तीन महामन्त्री निर्वाचनबाट आएका थिए।’
नेता व्यवस्थापन गर्न सहमहामन्त्री र सहायक महामन्त्रीजस्ता पदसमेत राप्रपामा छ।
पार्टीको अघिल्लो नेतृत्वले हचुवाका भरमा विधान बनाएको आरोपसमेत श्रेष्ठको छ।
‘अघिल्लो नेतृत्वले हचुवाका भरमा विधान बनाएर हलमा ल्याई पास गर्दा त्यसको फाइदा अध्यक्ष लिङ्देनले लिएको हो,’ उनले भने।
