काठमाडौं महानगरपालिकाका मेयर विद्यासुन्दर शाक्यले पार्टीले जिम्मेवारी दिए पुनः महानगरको प्रमुखमा आफ्नो दाबेदारी रहेको बताएका छन्।
बिहीबार काठमाडौं महानगरपालिका २१ वडाबाट निर्माणाधीन गोफल टोलस्थित श्रीधर नारायण परिसरको फल्चा र पार्कको शिलान्यास कार्यक्रममा बोल्दै मेयर शाक्यले यस्तो बताएका हुन्।
उनले पार्टीले जिम्मेवारी दिए र महानगरवासीको सहयोग रहेमा पुनः आफ्नो दाबेदारी रहेको बताए। मेयर शाक्यले आफ्नो कार्यकालमा धेरै स्थानमा सांस्कृतिक सम्पदाहरुको शिलान्यास गरिएको र सम्पदा निर्माणको काम चाँडै सकेर उद्घाटन गरिने बताए।
‘आगामी निर्वाचनको लागि अहिले नै उम्मेदवारी दिन्छु भनेर त नभनौँ। म एउटा पार्टीको कार्यकर्ता हो। पार्टीले आवश्यक्ता अनुसार कुन जिम्मेवारी दिने हो, त्यो पार्टीले निर्णय गर्ने कुरा हो’, उनले भने, ‘अर्को भनेको महानगरवासीको चाहना के छ? त्यो पार्टीले बुझेर जिम्मा दिए काम गर्ने हो, होइन भने पार्टीले जसलाई जिम्मा दिए पनि काठमाडौं महानगरपालिका हामी जित्ने गरेर तयारी अवस्थामा छौं।’
उनले विकास निर्माणका काम भनेको निरन्तर रुपमा चल्ने प्रक्रिया रहेको भन्दै कहिले पनि सकियो भन्ने नहुने बताए। ‘एउटा सकिन्छ, अर्को काम शुरु हुन्छ। यो निरन्तर रुपमा चलिरहन्छ। हामीले हाम्रो कार्यकालमा धेरै शिलान्यास गरिसकेका छौं। शिलान्यास धेरै भयो उद्घाटन कहिले हुन्छ भन्ने कुरा आउँछ, निश्चित समयमा बन्छ,’ उनले भने।
मेयर शाक्यले महानगरपालिका ऐतिहासिक, सांस्कृतिक सम्पदालाई संरक्षण, संवद्र्धन र पर्यटनसँग जोड्ने काम महानगरको भएको बताए।
उनले महानगरको नीति अनुसार आगामी दिनमा पनि सांस्कृतिक सम्पदाको संरक्षण गर्दै जाने बताए।
‘काठमाडौं महानगरपालिका ऐतिहासिक, सांस्कृतिक शहर हो। जता हेर्दा पनि मन्दिर नै मन्दिर छन्। पार्टी पौवाहरु प्रशस्त छन्। त्यो बेला जसले बनाए पनि अहिले हाम्रो लागि सम्पदा बनेका छन्’, उनले भने, ‘सम्पदालाई संरक्षण गर्नु, प्रवर्द्धन र पर्यटनसँग जोड्नु महानगरको नीति नै रहेको छ।’
उनले यहाँका जति पनि सम्पदा, मठ मन्दिर छन् तीनले आफ्नो महत्व बोकेको भन्दै सबै पुनर्निर्माण गरिदिने बताए।
मेयर शाक्यले विकास निर्माणका काम कहिल्यै नसकिने भन्दै निरन्तर रुपमा काठमाडौंको विकासका लागि महानगर लागि रहने प्रतिवद्धता समेत जनाए।
उनले रानीपोखरीको केही काम बाँकी रहेकोले काम सम्पन्न हुनासाथ सर्वसाधारणका लागि खुला गर्ने पनि बताए।
