सत्तारूढ दल नेकपा (एकीकृत समाजवादी) ले केन्द्रीय सचिवालयको बैठक बोलाएको छ ।
अमेरिकी सहायता परियोजना (एमसिसी) को विषयमा पार्टीभित्रै फरक-फरक मत र विवाद देखिएपछि आज सचिवालयको बैठक बोलाइएको छ।
बैठकमा समसामयीक राजनीतिक अवस्था, एमसिसी र सरकारबारे पार्टीको धारणालगायतका विषयमा छलफल हुनेछन्।
बैठक बिजुलीबजारमा दिउँसो १ बजे बस्ने भएको छ।
नेकपा (एकीकृत समाजवादी) को शनिबार बसेको स्थायी कमिटीले एमसीसीबारे गरेको निर्णयमा शीर्ष नेताबीच नै विवाद देखिएको थियो।
पार्टी अध्यक्ष माधवकुमार नेपालले यथास्थितिमा एमसिसी संसदबाट अनुमोदन गर्न नसकिने बताएका छन्।
‘हाम्रो पार्टीको २०७८ फागुन ७ गते बसेको स्थायी कमिटीको बैठकको निर्णयप्रति हामी प्रतिबद्ध छौं। यथास्थितिमा एमसिसी संसदबाट अनुमोदन गर्न सकिन्न,’ अध्यक्ष नेपालले भने।
उनले सहमतीमा मात्र एमसिसी अगाडि बढाउनुपर्ने दोहोर्याए। ‘असहमति र विरोधका बीच संसदमा टेबल गरिएको विषयप्रति केवल सांसदहरूको मात्र होइन सबै तहका जनताको विरोध वा समर्थन हुन सक्छ। यसो गर्न पाउनु हाम्रै संघर्षबाट स्थापित लोकतान्त्रिक एवम् जनताको अधिकारको विषय हो,’ उनले अगाडि भनेका छन्।
उनले एमसिसीको विरोधमा भएको प्रदर्शनप्रति प्रहरी हस्तक्षेपको पनि विरोध गरे।
‘संविधान प्रदत्त अधिकारको प्रयोग गर्दै गरिएको प्रदर्शनमा गरिएको दमन र बल प्रयोगप्रति गम्भीर असहमतिसहित बिरोध गर्दै घाइतेहरूको शिघ्र स्वास्थ्यलाभको कामना एवम् उहाँहरूको सम्पूर्ण रूपमा उपचार व्यवस्था मिलाउन नेपाल सरकारको ध्यानाकर्षण गराउँछु’, अध्यक्ष नेपालले भनेका छन्।
यस्तै सम्मानित नेता झलनाथ खनालले आफ्नो सहमतिविपरीत एमसीसी टेबल गर्न दिएको भन्दै कडा प्रतिक्रिया जनाएका थिए। उनले सदनमा एमसीसी टेबल हुँदासमेत उठेर विरोध गरेका थिए।
