नेपाली कांग्रेसका महामन्त्री विश्वप्रकाश शर्माले काठमाडौंको बानेश्वरमा एमसिसीविरूद्ध प्रदर्शन गरिरहेका युवाहरूको कुनै दोष नभएको बताएका छन्।
उनले ती युवाहरूको दोष नभई द्वैध चरित्र भएका नेताहरू दोषी भएको बताएका हुन्।
बिहीबार सामाजिक सञ्जालमा लेख्दै उनले भनेका छन्,‘सडकमा एमसिसीको विरोध गरिरहेका युवाको कुनै दोष छैन। दोषी त ती द्वैध चरित्र भएका नेताहरू हुन् जो बालुवाटारमा एउटा कुरा गर्छन्, बानेश्वरमा अर्को,’ शर्माले लेखेका छन्।
उनले क्षणिक लोकप्रियता रोज्ने कि दीर्घकालीन लोकहित खोज्ने भन्नेबारेमा पनि टुंगो लगाउनुपर्ने बताए।
‘अब टुंगो गरौं, क्षणिक लोकप्रियता रोज्ने कि दीर्घकालीन लोकहित ? आवेग र उग्रताले राष्ट्रहरू समृद्ध बनेका छन् कि ‘जिम्मेवार राष्ट्रवाद’ले ?,’ उनले प्रश्न गरे।
बिहीबार प्रतिनिधि सभाको बैठक बस्दैछ। बैठकमा एमसिसीबारे छलफल हुने कार्यसूची तय छ।
संसद भवन बाहिर एमसिसीको विरोधमा प्रदर्शनकारीहरू भेला भएका छन्।
फागुन ८ मा अर्थमन्त्री जनादर्न शर्मा अनुपस्थित भएपछि सञ्चार तथा सूचना प्रविधि मन्त्री ज्ञानेन्द्रबहादुर कार्कीले बैठकमा एमसिसी टेबल गरेका थिए।
