नेपाली कांग्रेसका महामन्त्री विश्वप्रकाश शर्माले संसदको गतिरोधलाई राजनीतिक संकटका रूपमा व्याख्या गर्न नहुने बताएका छन्।
शनिबार काठमाडौंमा आयोजित एक कार्यक्रममा महामन्त्री शर्माले देशमा राजनीतिक संकट नभएको स्पष्ट पार्दै आर्थिक र सामाजिक रुपान्तरणबाट समृद्धि हासिल गर्न सबै एकजुट हुनुपर्ने बताएका हुन्।
‘राजनीतिक सङ्कट त्यसबेला हुन्छ जब हिंसात्मक द्वन्द्व चलिरहेको हुन्छ । ती संकटसँग सामना गरेर हामी एउटा बाटोमा आइसक्यौं। काम गर्नका लागि प्रतिस्पर्धाको मनोविज्ञान बनाउनुपर्छ,’ महामन्त्री शर्माले भने।
उनले जुनसुकै दल र आस्था भए पनि अब सोच्ने साझा कुरा आर्थिक र सामाजिक रुपान्तरण नै रहेको बताए ।
‘त्यसका लागि हामी एकमत हुन आवश्यक छ,’ महामन्त्री शर्माले भने।
