नेपाली कांग्रेसले स्थानीय तहको चुनावका लागि गरिने एक महिने अभियानका लागि केन्द्रीय प्रतिनिधि खटाएको छ।
केन्द्रीय सदस्यहरूलाई ७७ जिल्लामा खटाइएको छ। खटिएका केन्द्रीय प्रतिनिधिको सूची बुधबार सार्वजनिक हुनेछ।
केन्द्रीय प्रतिनिधि अब जिल्लाका पालिकास्तरमा पुगेर ८ वटा काम गर्नुपर्ने हुन्छ।
जिल्ला खटिने केन्द्रीय प्रतिनिधिलाई आज सानेपास्थित पार्टी कार्यालयमा सभापतिसमेत रहेका प्रधानमन्त्री शेरबहादुर देउवाले आवश्यक निर्देशन दिए।
उनले स्थानीय चुनाव प्रभावकारी बनाउन र पार्टीका उम्मेदवार जित्ने गरी तयारी गर्न केन्द्रीय प्रतिनिधिलाई निर्देशन दिएका छन्।
कांग्रेसले यही फागुन २९ देखि चैत २९ गतेसम्म एक महिना 'घरघर जाऔं कांग्रेस जिताऔं' अभियान सञ्चालन गर्दैछ।
अभियानका लागि खटिएका केन्द्रीय प्रतिनिधि फागुन २७ भित्र जिल्ला पुगिसक्नुपर्नेछ।
कांग्रेसले यो अभियानमार्फत् आठ काम गर्ने बताएको छ।
०७९ वैशाख ३० मा हुने स्थानीय चुनावका लागि मतदातालाई अपिल गर्नेदेखि एमसिसीका बारेमा रहेका भ्रम चिर्नेसम्म काम केन्द्रीय प्रतिनिधिले गर्नुपर्नेछ।
पार्टीलाई स्थानीय चुनावमा जिताउन टोल, वडाभित्र एकता र ऊर्जा अभिवृद्धि गर्ने, 'हरेक काँधलाई भारी हरेक हातलाई जिम्मेवारी'अनुसार स्थानीय चुनावमा कार्यकर्ता परिचालन गर्ने तयारी छ।
केन्द्रीय प्रतिनिधिलाई कांग्रेसले गरेका राजनीतिक र आर्थिक गतिविधिबारे जनसमक्ष राख्ने र नेकपा सरकारका पालामा भएका जनविरोधी र असंवैधानिक काम तथा भ्रष्टाचार भण्डाफोर गर्ने जिम्मेवारी पनि छ।
पार्टी प्रतिपक्षबाट कसरी सरकारमा पुग्यो भन्नेबारे यथार्थ विवरणसमेत जनतासमक्ष राख्न कांग्रेसले निर्देशन दिएको छ भने कोरोनाविरूद्ध खोप लगाइसकिएको कुरा भन्न पनि कांग्रेसले निर्देशन दिएको छ।
एमसिसीबारेका भ्रम चिर्न बुँदाबुँदामा छलफल गरेर बुझाउनसमेत कांग्रेसले केन्द्रीय प्रतिनिधिलाई निर्देशन दिएको छ।
केन्द्रीय प्रतिनिधि सबै स्थानीय तहमा कम्तिमा एकपटक अनिवार्य पुग्नुपर्नेछ।
