नेकपा (एमाले) अध्यक्ष केपी शर्मा ओलीले भक्तपुरको सूर्यविनायकमा स्थापना भएको तरकारी बजारको उद्घाटन गरेका छन्।
झापाका मेडिकल व्यवसायी तथा नेकपा एमालेका केन्द्रीय सदस्य दुर्गा प्रसाईंले भक्तपुरमा सञ्चालनमा ल्याएको तरकारी पसलको ओलीले बुधबार उद्घाटन गरेका हुन्।
बजारको नाम ‘सूर्यविनायक हरित तथा कृषि थोक बजार’ रहेको छ। सूर्यविनायक नगरपालिका-८ को ५० रोपनी जग्गामा प्रसाईंले तरकारी बजार सञ्चालनमा ल्याएका हुन्।
उद्घाटनपछि ओलीले प्रसाईंले जुन सोच अगाडि सारेर तरकारी बजार खोले उनी धन्यवादको पात्र रहेको बताए।
‘म यस तरकारी बजारको सफलताको निम्ति शुभकामना भन्न चाहन्छु,’ ओलीले भने, ‘यो बजारले यहाँका किसानको जीवन उठाउन र कृषिको आधुनिकीकरण, अर्ग्यानिक खेतीका लागि प्रोत्साहित गर्नेछ।’
उनले कृषिको आधुनिकीकरण, व्यावसायीकरण, कृषिको शुद्धीकरण सुरू भएको बताए।
‘विषादीयुक्त तरकारी भान्सामा नपुगोस् यसतर्फ पनि ध्यान दिन जरूरी छ। यस सफलताको निम्ति खुसी व्यक्त गर्न मन लागेको छ,’ ओलीले भने, ‘नेपालमा सबैभन्दा ठूलो कृषि थोक बजार यही होला। प्रसाईंजीलाई बधाई भन्न चाहन्छु। यस्ता विभिन्न प्रकारका काम उहाँले थुप्रै गर्नुभएको छ।’
प्रसाईंले दुई अर्ब रुपैयाँभन्दा बढी लगानी गरेर तरकारी बजार सञ्चालनमा ल्याएका छन्। तरकारी पसलमा ४४ सय जनाले प्रत्यक्ष रोजगारी पाउने र दुई हजार दुई सय स्टल राखिएको प्रसाईंले बताए।
तरकारी पसलको जग्गा प्रसाईं आफैंले खरिद गरेका हुन्। तरकारीमा बिचौलियाको अन्त्य गरी किसानलाई राहत दिन आफूले तरकारी बजार सञ्चालनमा ल्याएको प्रसाईंले बताए।
तरकारी बजारको निर्माण २०७५ सालबाट सुरू गरिएको थियो। कोरोना महामारीका कारण काममा बाधा परेकाले सञ्चालनमा ल्याउन केही ढिलो भएको उनले बताए।
‘कृषि कार्यका लागि हामीले कतै पनि अनुदान लिएका छैनौं, आफ्नै लगानीमा मात्रै आधारित भएर तरकारी बजार सञ्चालनमा ल्याइएको हो,’ प्रसाईंले भने, ‘यहाँ देशभरिबाट तरकारी आउँछ, कृषकको हितलाई ध्यानमा राखेर बजार स्थापना गरेको हुँ।’
छ महिनाअघि माओवादी केन्द्र छोडेर नेकपा एमालेमा आएका उनलाई ओलीले केन्द्रीय समितिमा मनोनित गरेका थिए। उनी एमालेको उद्योग विभागका उपप्रमुख छन्।
कार्यक्रम उद्घाटनमा मन्तव्य राख्दै प्रसाईंले स्थानीय उत्पादनलाई प्रोत्साहित र बजारीकरण गर्न आफूले कृषि बजार स्थापना गरेको बताए।
कृषिजन्य उत्पादनमा बिचौलियाहरूले राज गरिरहेको भन्दै प्रसाईंले यो बजारबाट बिचौलियाको अन्त्य हुने दाबी गरे।
‘कृषि बजार बिचौलियाबाट मुक्त हुनेछ र म आजै घोषणा गर्छु, बिचौलियाबाट मुक्त राख्नेछौं, यो भक्तपुरबासी किसान मजदुरको आफ्नै तरकारी बजार हो,’ उनले भने।
व्यावसायिक रूपमा केही गर्न चाहने व्यक्तिले सधैं आगोमा हाम्फाल्नु परिरहेको भन्दै प्रसाईंले आफूले कैयन चुनौतीका पहाड सामना गरेको बताए।
‘देशमा केही तत्व छन् जो गरिब र जनताको जीवन उकासेको हेर्नै चाहँदैनन्,’ उनले भने, ‘आगोसँग खेल्ने चुनौती कसै न कसैले त लिनुपरो, त्यसैले मैले यो चुनौती मोलेको हो।’
प्रसाईंले आफूले व्यवसाय गर्दा ‘माफिया’ भन्ने गरेको र केही सञ्चारमाध्यमले गुण र दोष नछुट्याई आफ्नो खेदो गरेको उनले बताए।
‘जनताको स्वास्थ्य उपचारको लागि अस्पताल खोल्दा, जनताका छोराछोरी पढाउन मेडिकल कलेज खोल्दा, जनताको सेवाका लागि काम गर्दा म माफिया हुन्छु भने म जीवनभर माफिया हुन तयार छु,’ प्रसाईंले भने।
प्रसाईंको तरकारी बजार उद्घाटन गर्ने कार्यक्रममा एमाले उपाध्यक्ष सुवासचन्द्र नेम्वाङ, भक्तपुरका सांसद महेश बस्नेतलगायत नेताहरू थिए।