नेकपा एमालेका अध्यक्ष केपी शर्मा ओलीले पाँच दलीय सत्ता गठबन्धनलाई एक/एक किलोका ढकको संज्ञा दिएका छन्। उनले एमालेचाहिँ सिंगै एक क्विन्टलको ढक रहेको दाबी गरे।
बुधबार भक्तपुरमा व्यवसायी दुर्गा प्रसाईंले सञ्चालनमा ल्याएको तरकारी बजार उद्घाटन गर्दै ओलीले यस्तो बताएका हुन्।
‘कतिपय साथीहरूलाई लाग्न सक्छ गठबन्धन गरेका छन्। अप्ठेरो पर्न सक्ला भनेर,’ ओलीले भने, ‘मैले भन्ने गरेको छु यदि एउटा तराजुमा एक/एक किलोका पाँच वटा ढक एकातिर राख्नुभयो र क्विन्टलको ढक अर्कातिर राख्नुभयो भने के हुन्छ? नेकपा एमाले क्विन्टलको ढक हो। पाँच वटा भनेका एक-एक किलोका ढक हुन्।’
ओलीले अब कुनै पनि पार्टीले एक्लै एमालेसँग लड्छु भन्ने कुरा नचिताए र नसोचे हुने दाबी गरे।
‘त्यसैले गठबन्धन गर्न जरूरी छ। एमालेसँग लड्न सकिँदैन भनेको ठिक छ। गठबन्धन गरेरै आउनुपर्छ। साह्रै बच्चा भयो भने गाह्रो हुन्छ। निहुरेर लडाइँ गर्नुपर्छ। कुम-कुममा खुट्टा राखेर पाँच जना आए त निहुरिन परेन,’ उनले भने, ‘लोभी पापीहरूको गठबन्धन कति गाह्रो होला?’
उनले गठबन्धनमा विवाद हुन्छ भनेर एकैदिनमा उम्मेदवारी गर्न सकिँदैन भनी निर्वाचन आयोग गुहारिरहेको बताए। गठबन्धनले दुई दिनसम्म मनोनयनको दिन राख्नुपर्ने भनिरहेको ओलीले बताए।
‘कहिल्यै भएको थियो दुई दिनसम्म मनोनयनको समय राखेको?,’ ओलीले भने, ‘उहाँहरूले गठबन्धनबिना लड्न सकिँदैन भनेको ठिक छ। गठबन्धन गरेर पनि एमालेसँग सकिँदैन भन्ने बुझ्न बाँकी छ।’