नेपाली कांग्रेस चितवनले भरतपुर महानगरपालिकाको मेयरका लागि लबिङ सुरू गरेको छ।
पार्टीका शीर्ष नेताहरूलाई भेटेर यसपालि भरतपुरको मेयर कांग्रेसले नै लिनुपर्ने भन्दै लबिङ सुरू भएको हो।
चितवन कांग्रेसका नेताहरूले आज पार्टीका वरिष्ठ नेता रामचन्द्र पौडेललाई भेटेर चितवनको मेयरका लागि पहल गरिदिन आग्रह गरेका छन्।
चितवनबाट केन्द्रीय सदस्य भएकाहरू दिनेश कोइराला, टेकप्रसाद गुरूङ, सभापति राजेश्वर खनाल, पूर्वसभापति जितनारायण श्रेष्ठ, नेपा जगन्नाथ पौडेल लगायतले आज वरिष्ठ नेता पौडेललाई भेटेका हुन्।
उनीहरूले प्रधानमन्त्रीसमेत रहेका पार्टी सभापति शेरबहादुर देउवालाई शुक्रबार भेटेर चितवनको मेयर पार्टीबाट नै लिनुपर्ने माग गर्ने भएका छन्।
आज वरिष्ठ नेत पौडेलले चितवनको मेयर लिन आफूले पहल गर्ने बताएका थिए।
पाँचदलीय गठबन्धनबाट स्थानीय तह चुनावमा गठबन्धन गर्ने सहमति गरेका छन्। तर कहाँ कुन दलले उम्मेदवारी दिने भन्ने टुंगिएको छैन। चैत २७ मा गठबन्धनको मोडालिटी तय गर्ने गठबन्धनको चुनावी अनुगमन समितिको तयारी छ।
भरतपुरमा ०७४ सालको स्थानीय चुनावमा कांग्रेसले माओवादी उम्मेदवार रेनु दाहाललाई सहयोग गरेको थियो। यसपालि माओवादीलाई मेयर छाड्न नसकिने कांग्रेसले बताउँदै आएको छ।
तर चितवनका सबै स्थानीय तहमा गठबन्धन गर्ने पाँचदलीय गठबन्धनमा रहेका दलका जिल्लास्तरीय नेताले सहमति गरिसकेका छन्।
