नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेभित्र सबै खराब छन् भन्ने सोच्न नहुने बताएका छन्।
तर एमाले नेतृत्व भने प्रतिगमनकारी भएको आरोप उनको थियो।
आज खुमलटारमा माओवादी ध्रुवीकरण तथा एकता कार्यक्रममा बोल्दै उनले एमाले र माओवादी मिलेर नेकपा हुँदाका प्रसंग पनि निकालेका थिए।
‘त्यसबेला अबको नेता प्रचण्ड नै हो भन्ने भएपछि नेकपाभित्र भयानक षड्यन्त्र सुरू भयो,’ प्रचण्डले भने, ‘केही समय रोकेको भए प्रचण्डले पार्टी खाइसकेको हुन्थ्यो भनेर त एमालेकै नेताहरू भन्छन्।’
उनले माओवादी ६० प्रतिशत र एमाले ४० प्रतिशतको हुन्थ्यो भने नेकपा फुट्ने अवस्था नआउने बताएका थिए।
‘परार एमालेसँग एकता गर्दा माओवादी नफुटेको हुन्थ्यो भने, तपाईं हामी सबै एकै ठाउँमा हुन्थ्यौं भने ६० र ४० भन्नेतिर जानुपर्ने थिएन,’ उनले भने, ‘माओवादी ६० र एमाले ४० भएको भए पार्टी फुट्ने थिएन।’
उनले एमालेभित्र धेरै इमान्दार कार्यकर्ता रहेको बताए।
‘एमालेका सबै खराब छन् भन्ने सोच्नु हुन्न। हामीले तीन वर्ष त त्यहीँ बसेर हेरियो। ८० प्रतिशतभन्दा बढी इमान्दार कम्युनिष्ट छन्,’ उनले भने, ‘नेतृत्वले यति धेरै भ्रम दिएर बन्दी बनाएर राखेकोजस्तो लाग्छ।’
उनले एमालेभित्र रहेका इमान्दार कार्यकर्ताको पनि आफूहरूले नेतृत्व गरेर जानुपर्ने बताए।
