शीर्ष नेताहरूको व्यस्तताले समाजवादी केन्द्र निर्माणको निम्ति बनाउने भनिएको संयोजन समिति बन्न अझै केही दिन लाग्ने भएको छ। माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी)का अध्यक्ष माधवकुमार नेपाल, पूर्वप्रधानमन्त्री बाबुराम भट्टराई, राष्ट्रिय सभा सदस्य वामदेव गौतमबीच साउन २ मा बसेको बैठकले सत्ता गठबन्धनभित्रैका दललाई समावेश गरेर समाजवादी केन्द्र निर्माण गर्ने विषयमा छलफल गरेका थिए।
नेता भट्टराईले समाजवादी केन्द्रको अघि नेकपा राख्न असहमति जनाएका थिए। माओवादी केन्द्रका नेता वर्षमान पुन र अध्यक्ष प्रचण्डसँग छुट्टाछुट्टै छलफल गरेपछि नेता भट्टराईसमेत समाजवादी केन्द्र निर्माणमा सहमति प्रदान गरेका थिए।
भट्टराईले समेत सहमति जनाएपछि मन र विचार मिल्नेहरूबीच एकता, सिद्धान्तमा सहमत हुनेहरूसँग मोर्चा र सहकार्य गर्न चाहने शक्तिहरूसँग गठबन्धन बनाएर अघि बढ्नका निम्ति संयोजन समिति गठन गर्ने भनिएको थियो।
शीर्ष नेताहरूको कार्यव्यस्तता कारण संयोजन समिति निर्माण हुन नसकेको एकीकृत समाजवादीका नेता प्रकाश ज्वालाले बताए।
‘शीर्ष नेताहरूको बैठकले समाजवादी केन्द्र निर्माण गर्ने अवधारणा बनाउनुभयो। त्यसलाई मूर्त रूप दिन संयोजन समिति बनाउने भनिएको हो। अब शीर्ष नेताहरू भेला भएर छिट्टै पूर्णता दिनुहुन्छ,’ ज्वालाले भने।
राष्ट्रिय राजनीतिमा समान धारणा, अन्तर्राष्ट्रिय मामलामा साझा दृष्टिकोण, पाँच वर्ष स्थिर सरकारको प्रतिवद्धतासहित साझा घोषणापत्र र साझा चुनाव चिन्ह लिएर जनतामा जानेगरी उनीहरूले गृहकार्य गरिरहेका हुन्। सत्ता गठबन्धनका वामपन्थी घटकबीच सबै एजेन्डामा एकरूपता र अवसरको बाँडफाँटमा समानताबारे सैद्धान्तिक सहमति जुटिसकेको छ। यसको व्यवहारिक कार्यान्वयनका निम्ति संयोजन समितिले काम गर्ने माओवादी केन्द्रका नेता वर्षमान पुनले बताए।
जनकपुर पुगेका माओवादी केन्द्रका अध्यक्ष प्रचण्डले शनिबार एक-दुई दिनभित्रै समाजवादी केन्द्र निर्माणको विषयलाई टुंगोमा पुर्याउने गरी अघि बढ्ने बताएका थिए।
