नेकपा माओवादी केन्द्रका अध्यक्ष पुष्पकमल दाहाल प्रचण्डले जापान पुगेर पूर्वप्रधानमन्त्री शिन्जो आबेलाई सम्झिएका छन्।
शनिबार जापानको फुकुओवा भएको नेपाली स्ट्रिट फेस्टिभलको उद्घाटन गर्दै उनले आफ्नो आबेसँग विशेष खालको मित्रता भएको बताएका हुन्।
जापान भ्रमण गर्नुअघि उनीसँग भेटघाट गर्न कुराकानी भइरहेको पनि उनले बताए।
‘जापानका पूर्व प्रधानमन्त्री आबेसँग मेरो विभिन्न रूपले सम्पर्क र कुराकानी हुने गरेको थियो। र उहाँसँग मेरो विशेष मित्रताको सम्बन्ध हुन पुगेको थियो। र मैले जापानमा आएको बेलामा उहाँसँग पनि भेट्ने र फेरि एकचोटी प्रत्यक्ष कुरा गर्ने इच्छा मैले जापनी रादूतावासमार्फत पुर्याएको पनि थिएँ,’ उनले भने।
त्यसबीचमा उनको हत्या भएको कारणले सो इच्छा पूरा नभएको पनि बताए।
‘तर दुर्भाग्य उहाँको यही बीचमा दुर्भाग्यपूर्ण अवसान भयो। म उहाँलाई श्रदा पूर्वक स्मरण गर्न चाहन्छु। शोक सन्तप्त परिवारहरू प्रति समवेदना पनि व्यक्त गर्न चाहन्छु,’ उनले भने, ‘जापानमा दुर्लभ, हुनैनहुने घटनाको रूपमा त्यो घटना घट्यो। हामी सबैलाई त्यसको दु:ख छ।’
उनले जापान पुगेर सञ्चारकर्मीहरूसँग कुराकानी गर्दा पनि आबेसँग भेट्ने चाहना पूरा नभएको बताएका थिए।
