सत्ता गठबन्धनसँग तालमेलको प्रयास सकरात्मक हुन नसकेपछि लोकतान्त्रिक समाजवादी पार्टीले एमालेसँग सहकार्यका लागि छलफल गरिरहेको छ।
प्रतिनिधि सभा निर्वाचनमा तालमेलका लागि लोसपाका अध्यक्ष महन्थ ठाकुरले एमाले अध्यक्ष केपी ओलीबीच लगातार संवाद भइरहेको छ। दुई जनाबीच मंगलबार, बुधबार र बिहीबार छलफल भएको एमाले अध्यक्ष ओलीको सचिवालयले जनाएको छ।
सत्ता गठबन्धनभन्दा एमालेसँगको छलफल सकरात्मक रहेको नेता लक्ष्मणलाल कर्णले बताए।
‘सत्ता गठबन्धनसँग भन्दा पनि एमालेसँगको छलफल बढी सकरात्मक छ,’ कर्णले सेतोपाटीसँग भने।
एमाले र आफूहरूबीच सिट बाँडफाँटको विषय छिट्टै टुंगिने कर्णले बताए।
‘अहिले गठबन्धन गर्ने सैद्धान्तिक सहमतिमा पुगेका छौं। सिट संख्या अब छिट्टै टुंगिन्छ,’ उनले भने।
लोसपाका अर्का नेता शरदसिंह भण्डारीले पनि एमालेसँगको छलफल सकरात्मक भएको बताए।
‘एमाले र हामीबीच छलफल सकरात्मक नै छ। दुई पार्टीबीच सहकार्यको च्याप्टर क्लोज भएको छैन,’ भण्डारीले भने।
प्रधानमन्त्री शेरबहादुर देउवा लोसपालाई गठबन्धनमा भित्र्याउनका निम्ति अध्यक्ष ठाकुर र नेता राजेन्द्र महतोलाई आफ्नो भागबाट दुई सिट दिन तयार भएका थिए।
सत्ता गठबन्धनका तर्फबाट हालसम्म पनि सहकार्यको प्रस्ताव नआएपछि लोसपाले एमालेसँगको संवादलाई सघन बनाएको हो।
सत्ता गठबन्धनसँग पनि समानन्तर छलफल गरिरेहको लोसपालाई एमाले अध्यक्ष ओलीले आफ्नो कित्ता प्रष्ट बनाउन भनेका छन्।
