संविधान दिवसको अवसर पारेर नेकपा एमालेले वाकाथुनको आयोजना गर्ने भएको छ।
एमालेले शनिबार ५ स्थानबाट भेला भएर बसन्तपुरसम्म पुग्ने कार्यक्रम राखेको छ।
काठमाडौंको बानेश्वर, लैनचौर, मैतीदेवी, कालिमाटी र कुपण्डोलबाट आउनेहरू सुन्धारामा जम्मा हुने र बसन्तपुरमा पुगेपछि सकिने एमाले प्रचार प्रसार विभागका उपप्रमुख विष्णु रिजालले बताए।
बसन्तपुरमा ओलीले वाकाथुनमा सहभागीहरूलाई धन्यवाद ज्ञापन गरेपछि कार्यक्रम सकिने रिजालले बताए। ओली बानेश्वरबाट हिँडेर बसन्तपुर आउने छन्।
संविधानको अपनत्व एमालेको हो भन्ने सन्देश दिन वाकाथुन आयोजना गरिएको रिजालले बताए।
'संविधान जारी भएपछि नाकाबन्दीको सामना हामीले व्यहोरेको हो। संविधानको न्वारन र पालनपोषण गर्ने एमाले हो,'रिजालले भने,'चुच्चे नक्सालाई संविधानको अनुसूचीमा राख्नका लागि एकताबद्ध गराउने पनि एमाले हो भन्ने तीन सन्देश हामीले दिन लागेका हौं।'
मंसिर ४ गतेको निर्वाचनका लागि एमाले पूर्ण रूपमा तयार छ भन्ने सन्देशसहित ५० हजारको सहभागितामा वाकाथुन हुने रिजालले दाबी गरे।
असोज ३ गते संविधान दिवस मनाउने गरिन्छ।