सभामुख अग्निप्रसाद सापकोटाले प्रतिनिधि सभा निर्वाचनमा उम्मदेवार नबन्ने घोषणा गरेका छन्।
२०७४ को निर्वाचनमा सिन्धुपाल्चोक-१ बाट निर्वाचित सापकोटा यसपटक पनि त्यहीँबाट उम्मदेवार बन्ने चर्चा थियो।
मनोनयन दर्ताको अघिल्लो दिन उनले आफू उम्मेदवार नबन्ने जानकारी गराएका हुन्।
शनिबार पत्रकार सम्मेलन गर्दै उनले भने, 'पार्टी, सिन्धुपाल्चोक र खासगरी क्षेत्र नम्बर १ का मतदाता तथा शुभचिन्तकहरूले पुनः प्रतिनिधिको भूमिका निर्वाह गरोस् भन्ने शुभेच्छा राख्नुभएकोमा धन्यवाद दिँदै आगामी २०७९ मंसिर ४ को प्रतिनिधि सभा निर्वाचनमा उम्मेदवार नबन्ने निर्णय गरेको निवेदन गर्न चाहन्छु।'
सापकोटा २०६४ र २०७० सालमा संविधान सभामा सिन्धुपाल्चोक-२ बाट प्रत्यक्ष निर्वाचित भएका थिए। उम्मेदवार सिफारिस गर्दा माओवादीको जिल्ला कमिटीले सभामुख सापकोटासँगै माधव सापकोटाको नाम सिफारिस गरेको थियो।
सत्ता गठबन्धनको भागबण्डामा सिन्धुपाल्चोक-१ माओवादी केन्द्र र २ कांग्रेसको भागमा परेको छ।
पत्रकार सम्मेलनमा सापकोटाले भने, 'मलाई लगातार तीन पटक निर्वाचित गरी राष्ट्रिय भूमिका निर्वाह गर्ने र जनताको सेवा गर्ने अवसर दिनुभएकोमा सिन्धुपाल्चोकका आदरणीय मतदाता एवम जनसमुदायमा हार्दिक आभार व्यक्त गर्छु। संघर्षशील पृष्ठभूमि, राजनीतिक पहलकदमीको सम्भाव्यता तथा जिम्मेवारीप्रतिको इमानदारिताका कारण पार्टी, सिन्धुपाल्चोक र खासगरी क्षेत्र नम्बर १ का मतदाता एवम् शुभचिन्तकहरूले पुनः जनप्रतिनिधिको भूमिका निर्वाह गरोस् भन्ने शुभेच्छा राख्नुभएकोमा धन्यवाद दिँदै आगामी २०७९ मंसिर ४ को प्रतिनिधि सभा निर्वाचनमा उम्मेदवार नबन्ने निर्णय गरेको निवेदन गर्न चाहन्छु। संसदीय भूमिका नरहे पनि म देश, जनता र अग्रगमनको पक्षमा निरन्तर क्रियाशील भइरहनेछु।
र, अग्रगामी राजनीतिक अभियन्तामार्फत आम नेपाली नागरिकको समुन्नतिका लागि आफ्नो बुद्धि र विवेकले भ्याएसम्म काम गर्नेछु। त्यस्तै, राज्य र जनताले आवश्यक ठानेमा जुनसुकै जिम्मेवारी वहन गर्न तयार छु। राजनीतिक एवम् सामाजिक मञ्चमार्फत सबै नेपालीको स्वाभिमान र आत्मविश्वास उचो बनाउन मेरो सक्रियतामा कुनै कमी आउन दिने छैन। मानव जातिको उन्नतिका लागि परिश्रम गर्नु मेरो जीवनको आदर्श हो।'