बाजुरामा अनेरास्ववियुका केन्द्रीय सदस्य चेतन अयडीको हत्या आरोपमा वडाध्यक्षसहित तीन जनालाई प्रहरीले पक्राउ गरेको छ।
प्रहरीले हत्या आरोपमा त्रिवेणी नगरपालिका वडा नम्बर ७ का वडाध्यक्ष जुद्धबहादुर अयडीसहित तीन जनालाई पक्राउ गरेको जिल्ला प्रहरी कार्यालयका डिएसपी सूर्य थापाले जानकारी दिए। जुद्धबहादुर नेपाली कांग्रेसबाट निर्वाचित वडाध्यक्ष हुन्।
उनले पक्राउ परेका अन्य दुई जनाको नाम खुलाएनन्।
‘अनुसन्धान जारी छ। अन्य व्यक्तिहरू भाग्न सक्ने हुँदा परिचय खुलाउन मिलेन,’ उनले भने।
मृतकका परिवारले २२ जनाविरूद्ध किटानी जाहेरी दिएका छन्। तर यसमा उनीहरू सबैको संलग्नता भए/नभएकोबारे अनुसन्धान भइरहेको प्रहरीले जनाएको छ।
डिएसपी थापाका अनुसार मृतक अयडीको मंसिर ४ गते निर्वाचनको दिनमा हत्या भएको थियो।
त्रिवेणी नगरपालिका-७ को नाटेश्वरी आधारभूत विद्यालयमा रहेको मतदान केन्द्रमा विवादपछि उनलाई कांग्रेस कार्यकर्ताले कुटपिट गरेको आरोप छ।
कुटपिटमा गम्भीर घाइते भएका उनलाई प्रहरीको मोबाइल टोलीले अछामस्थित बयालपाटा अस्पताल लगिएको थियो।
त्यहाँ उपचारको क्रममा राति पौने २ बजे मृत्यु भएको हो। मृतक ऐडी अनेरास्ववियु सुदूरपश्चिम विश्वविद्यालय अध्यक्षसमेत हुन्।
त्यस दिन प्रहरीको गोली लागेर एक जनाको मृत्यु समेत भएको थियो। दुई पक्षबीच झडप हुँदा त्यस माहोललाई नियन्त्रणमा लिन प्रहरीले गोली चलाएको थियो। उक्त गोली लागेर २२ वर्षीय सञ्जिब अयडीको मृत्यु भएको थियो।
यो पनि:
बाजुराको चुनावी झडपमा घाइते भएका अनेरास्ववियुका नेता ऐडीको मृत्यु
