नेकपा एमालेका अध्यक्ष केपी शर्मा ओलीले नयाँ सरकार गठनका लागि सेटिङ र लेनदेन सुरू भएको बताएका छन्।
राजधानीमा मंगलबार आयोजित कार्यक्रमलाई सम्बोधन गर्दै उनले सत्ता गठबन्धनले सरकार निर्माणका लागि स्पष्ट बहुमत नल्याउँदा नयाँ सरकार बनाउन लेनदेन सुरू भएको बताएका हुन्।
'लोकतन्त्रमा सरकार गठनका लागि अन्यौलता हुनु राम्रो होइन। तर लोकतन्त्र कमजोर हुँदा यो परिस्थितिमा आइपुग्यो। सात वटा त राष्ट्रिय दलनै छन्। सरकार गठन कुनै उद्धेश्य वा विकासका लागि होइन लेनदेन र सेटिङमा भइरहेको छ,' उनले भने।
सरकार गठनको संवाद पदमा केन्द्रित रहेको उनले बताए।
'सरकार सुशासनका लागि जनतालाई सुविधा दिनका लागि हुनुपर्ने हो कोही पनि सरकार कस्तो भन्ने भन्दामा पनि विकास र सुशासनलाई कमजोर पार्ने तरिकाले छलफल भइरहेको छ,' ओलीले भने।
सरकार गठनको अनुचित गतिविधिप्रति एमाले असहमत रहेको बताए।
'लेनदेन र सेटिङमा सरकार गठन गर्नेमा एमाले सहमत छैन। यस्तो गतिविधि हामी गर्दैनौँ,' ओलीले भने।
एमाले सत्ता वा प्रतिपक्षमा जहाँ भए पनि मुलुकको स्थायित्व र सुशासनका पक्षमा दृढतापूर्वक उभिने उनले प्रतिवद्धता व्यक्त गरे।
