लुम्बिनी प्रदेशमा पुस २७ गते भित्रै मुख्यमन्त्रीमा दाबी पेश गर्न आह्वान भएको छ।
प्रदेश प्रमुख अमिक शेरचनले बिहीबार प्रेस विज्ञप्ति जारी गर्दै पुस २७ गते दिउँसो ४ बजेभित्र मुख्यमन्त्रीमा दावी पेश गर्न दलहरूलाई आह्वान गरेका हुन्।
कुनै दलको बहुमत नभएको स्मरण गराउँदै दुई वा दुईभन्दा बढी दलको समर्थनमा बहुमत प्राप्त प्रदेशसभा सदस्यलाई मुख्यमन्त्रीमा दावी पेश उक्त समय सीमा दिएका हुन्।
योसँगै अब लुम्बिनीमा सत्तासिन दल नेकपा एमालेकी लिला गिरी वा नेकपा माओवादी केन्द्रका जोखबहादुर महरामध्ये मुख्यमन्त्री को हुने भन्ने चासोको विषय बनेको छ।
गिरीले रुपेन्देहीको र महराले रोल्पाको प्रतिनिधित्व गर्छन्।
प्रदेशमा सबैभन्दा ठूलो भएकाले पनि लुम्बिनीको मुख्यमन्त्रीमा एमालेको दाबी स्वाभाविक रहेको पार्टी महासचिव शंकर पोखरेल बताउँछन्। त्यस्तै माओवादी नेताहरू पनि लुम्बिनीमा आफ्नो दाबी नछाड्ने पक्षमा छन्।
लुम्बिनी प्रदेश सभामा कुल ८७ सदस्य छन्। बहुमत पुर्याउन ४४ सांसद चाहिन्छ।
यहाँ सत्ता गठबन्धन दलहरू एमालेका २९, माओवादी केन्द्रका १०, राप्रपा र नागरिक उन्मुक्ति पार्टीका ४-४ जना, जसपा र जनमत पार्टीका ३-३ जना सांसद छन्। यो गठबन्धनको ५२ जना सांसद छन्। जुन सरकार गठनका लागि प्रयाप्त हो।
पछिल्लो समय टिकट नपाउँदा नेकपा माओवादी केन्द्रबाट विद्रोह गरी स्वतन्त्र रूपमा निर्वाचित रोल्पाका दिपेन्द्र पुन पनि माओवादीमा प्रवेश गरेका छन्। उनीसहित सत्तापक्षको संख्या ५३ पुगेको हो।
सत्ता गठबन्धनलाई सहज देखिएपनि नेपाली कांग्रेस पनि आफ्नै सरकार बनाउन लागि परेको छ।
दोस्रो ठूलो दल तथा प्रमुख प्रतिपक्षी नेपाली कांग्रेसका यहाँ २७ सांसद छन्। त्यस्तै हालसम्म विपक्षी मानिएका लोकतान्त्रिक समाजवादी पार्टीका ३, राष्ट्रिय जनमोर्चा र नेकपा एकीकृत समाजवादीका समान १-१ सांसद छन्।
माओवादीबाट विद्रोह गरी स्वतन्त्र जितेका २ सांसद पनि हालसम्म विपक्षीमै देखिएका छन्। उनीहरू सबै मिलेपनि संख्या जम्मा ३४ मात्रै पुग्छ। त्यसैले यो योगफल समिकरण नभत्किँदासम्म सरकार गठनका लागि प्रयाप्त देखिँदैन।
