प्रधानमन्त्री पुष्पकमल दाहाल ‘प्रचण्ड’ले संविधान संशोधन नभएसम्म संविधानको पालना अनिवार्य रहेको बताएका छन्।
मंगलबार विश्वासको मत लिने प्रस्तावमाथि भएको छलफलमा सांसदहरूले गरेका प्रश्नको जवाफ दिने क्रममा प्रधानमन्त्री प्रचण्डले संविधान संशोधन नहुँदासम्म हरेक प्रावधानको पालनाका लागि सबैजना बाध्यकारी हुने बताएका हुन्।
‘सदन विघटन गर्नु सही थियो वा गलत भन्ने विषय अहिले सत्ता साझेदारको विषय होइन। तर २०७२ मा सहमतिका साथ बनाइएको संविधान परिमार्जन नहुन्जेलसम्म अनिवार्य पालनाका लागि हामी प्रतिवद्ध हुनैपर्छ,’ उनले भने।
वर्तमान सत्ता गठबन्धन संविधान, लोकतान्त्रिक गणतन्त्र र संघीयताको पालनाका लागि प्रतिवद्ध रहेको उनले बताए।
‘सत्ता गठबन्धन र सत्ता बाहिर रहेका दलहरूमा अझै पनि केही असहमति छँदैछन्। तर संविधान, संघीयता र लोकतान्त्रिक गणतन्त्रको रक्षामा प्रतिवद्ध हुनेगरी साझा न्यूनतम कार्यक्रम बनाएका छौं। त्यही कार्यक्रमले नै हामीलाई एकतावद्ध बनाएको छ,’ उनले भने।
यसअघि संसदमा बोल्दै नेपाली कांग्रेसका सभापति शेरबहादुर देउवा र नेकपा (एकीकृत समाजवादी) अध्यक्ष माधवकुमार नेपालले प्रतिनिधि सभा विघटनबारे नेकपा (एमाले) का अध्यक्ष केपी शर्मा ओलीले दिएको अभिव्यक्तिप्रति आपत्ति जनाएका थिए।
प्रचण्डलाई विश्वासको मत दिने बताएका देउवा र नेपालले यो विषयमा सवाल उठाएपछि जवाफ दिने क्रममा प्रचण्डले घुमाउरो शैलीमा संसद विघटन संविधानसम्मत नभएको बताएका हुन्।
