जिल्ला अदालत काठमाडौंले मानव बेचबिखनको मुद्दा लागेका मोडल ग्लोबल भिजाज कन्सल्टेन्सीका सञ्चालक मनोज पाण्डेलाई ७ वर्ष कैद सजाय सुनाएको छ।
न्यायाधीश दीपक ढकालको इजलासले सात वर्ष कैद सजाय र पीडितलाई ७५ हजार क्षतिपूर्ति दिनुपर्ने फैसला गरेको जिल्ला अदालत काठमाडौंका सूचना अधिकारी दीपक दाहालले जानकारी दिए।
न्यायाधीश ढकालको इजलासले मानववेचविखन ऐनको दफा ४ उपदफा २ को (ख) बमोजिम कसुर गरेको भन्दै सोही ऐनको दफा १५ दफा १को(छ) ७ वर्ष कैद र पिडितलाई ७५ हजार क्षतिपूर्ति दिलाएको हो।
सरकारी वकिलले भने पाण्डेलाई मानव ओसार पसार गरेको पुष्टी भएको भन्दै दुईवटा सजाय माग गरेको थियो। मानव बेचविखन तथा ओसारपसार विरूद्धको ऐनको दफा ४ उपदफा २ को (ख) बमोजिम कसुर गरेकोमा दफा १५ को उपदफा १ को (छ) अनुसार ७ वर्षदेखि १० वर्षसम्म कैद हुनुपर्ने एउटा माग थियो। बालबालिकालाई किन्न, बेच्ने वा शोषण गर्ने उद्देश्यले नेपालको एक ठाउँबाट अर्को ठाउँमा लगेमा उक्त ऐनको दफा १५ को उपदफा १ (ङ) को २ अनुसार १० देखि १२ वर्षसम्म कैद सजाय हुनुपर्ने पनि सरकारी वकिलको माग थियो।
यसअघि बाल यौन दुर्व्यवहारमा जिल्ला अदालतले पाण्डेलाई ६ महिना कैद र पिडितलाई ५० हजार क्षतिपूर्ति भराउन आदेश गरको थियो।
८ वर्ष अघि सौन्दर्यप्रतियोगिताकी सहभागी एक किशोरीलाई उनले बलात्कार गरेको आरोप लागेको थियो। उनले आफूमात्र होइन आफ्ना साथीहरूलाई समेत उनीमाथि बलात्कार गर्न लगाएको खुलेपछि प्रहरीले मानवबेचविखनमा अनुसन्धान गरेको थियो। प्रहरीको अनुसन्धानका आधारमा सरकारी वकिलले पाण्डे विरूद्ध मानवबेचविखन गरेको र बाल यौन दुराचार गरेको भन्दै मुद्दा दायर गरेको थियो।
त्यतिबेला उनले किशोरी बलात्कार गरेको आरोपमा अहिले आएर मुद्दा दर्ता गर्न कानुनी अड्चन थियो। बलात्कार घटनाको उजुरी १ वर्ष भित्रै दिनुपर्ने कानुन भएकाले आठ वर्षपछि बाहिर आएको यो घटनामा बलात्कार मुद्दा चलाउन मिलेको थिएन।
त्यसपछि सरकारी वकिलले मानव बेचविखन र बाल यौन दुर्व्यवहारमा मुद्दा चलाएको थियो। यो घटनापछि बलात्कारका घटना उजुरी दर्ता गर्ने हदम्याद हटाउनुपर्ने माग उठेको थियो। व्यवस्थापिका संसदले बलात्कारमा उजुरी गर्ने म्याद बढाएर २ वर्ष पुर्याएको छ।
पाण्डेले मिस ग्लोबल इन्टरनेसनलमा भाग लिएकी १६ वर्षीया किशोरीलाई आमाबुवाको अनुमतिबिना एउटा ठाउँ भनी अर्को ठाउँ बोलाएर बलात्कार गरेको र अरूलाई समेत बलात्कार गर्न लगाएको भन्दै सरकारी वकिलले मानव बेचबिखन र बाल यौन दुराचार मुद्दा लगाएको थियो।
प्रहरीले जेठ ७ गते स्वयम्भुबाट पाण्डेलाई पक्राउ गरेको थियो। उनी अहिले पनि पुर्पक्षका लागि थुनामै छन्।
जिल्ला परिसर काठमाडौंले अनुसन्धान सकेर गएको जेठ २७ गते आफ्नो प्रतिवेदन सरकारी वकिल कार्यालयमा बुझाएको थियो। पाण्डेद्वारा सञ्चालित मोडल ग्लोबल भिसाज कन्सल्टेन्सीले विद्यार्थीहरूलाई विदेश पठाउने र मिस नेपालजस्ता सुन्दरी प्रतियोगिता तथा कार्यक्रम आयोजना गर्छ।
मिस ग्लोबल पनि यही कन्सल्टेन्सीले आयोजना गरेको हो।
मिस ग्लोबल प्रतियोगितामा आफू छानिएपछि आयोजक कन्सल्टेन्सीका सञ्चालक पाण्डेले आफूलाई सफलताको पार्टीका लागि बानेश्वरस्थित एभरेस्ट होटलमा बोलाएको युवतीले बताएकी थिइन्।
आफू त्यहाँ पुग्दा सञ्चालकबाहेक कोही नभएको उनले भनेकी थिइन्।
उनका अनुसार, किन कोही नभएको भनेर सोध्दा ती सञ्चालकले 'तिमी अलि छिटो आयौ, एकछिन बस, पाँच-छ बजेबाट पार्टी सुरू हुन्छ' भनेका थिए।
एकछिन बसेपछि उनले किशोरीलाई लेमोनेड खान दिए। त्यसपछि कोठामा लगेर बलात्कार गरेको उनले भनेकी थिइन्। घटनाबारे कसैलाई बताए फोटो र भिडिओ सार्वजनिक गरिदिन्छु भनेर धम्क्याएको उनले बताएकी थिइन्।
यी पनि: कन्सल्टेन्सी सञ्चालकले एक किशोरीलाई बेहोस हुने औषधि खुवाएर बलात्कार गरेको सार्वजनिक
बलात्कारमा परेँ भनेर फोन गर्ने किशोरीलाई माल्भिकाले भनिन्- त्यो बेला सहयोग गर्न नसकेकोमा माफी चाहन्छु
१६ वर्षीया किशोरीले सुनाएको बलात्कार घटना यसरी सम्झन्छन् दुई साक्षी
१६ वर्षमा बलात्कारमा परेकी युवतीको घरमा पुग्यो प्रहरी टोली
समाज हल्लाउने बलात्कारको घटनाविरुद्ध माइतीघरमा पोखियो आक्रोश (भिडिओ)
आठ वर्षअघिको बलात्कार घटनामा युवतीले यो कानुन टेकेर दिन सक्छिन् अहिले जाहेरी
