नेपाली कांग्रेसका महामन्त्री गगन थापाले राष्ट्रपति उम्मेदवारमा आफूहरूले प्रस्ताव गरेको उम्मेदवार जिताउन लागिपर्ने बताएका छन्।
उनले नेकपा एमालेले प्रस्ताव गरेको राष्ट्रपति उम्मेदवारलाई हराउन लाग्ने पनि बताए।
‘लुकाउने कुरा छैन, हामी नेकपा एमालेले प्रस्ताव गरेको राष्ट्रपति उम्मेदवारलाई हराउँछौं। हराएरै छाड्छौं,’ काठमाडौंमा बुधबार भएको 'आजको नेपाली राजनीति र लोकतान्त्रिक संस्कारको सवाल' विषयक विचार गोष्ठीमा थापाले भने, ‘हामीले भनेको उम्मेदवार जिताउने कोशिस गर्छौं। मत माग्छौं।’
राष्ट्रपति को हुनेभन्दा पनि संविधान दुर्घटनातर्फ जान्छ कि भन्ने डर कांग्रेसभित्र रहेको उनले बताए। ‘हिजोको राष्ट्रपतिहरूको भूमिकाका कारण डर पसेको छ,’ उनले भने, ‘त्यो डरबाट हामी मुक्त हुन चाहन्छौं।’
नेकपा एमालेले आफ्नो कार्यकर्तालाई राष्ट्रपति बनायो भने त्यसलाई ‘सम्माननिय कठपुतली राष्ट्रपति’ भने हुने थापाले बताए। ‘त्यसले विस्तारै समानान्तर शक्तिको अभ्यास गर्छ। बालुवाटार र शितलनिवासले कार्यकारी अधिकार प्रयोग गर्दा संविधान दुर्घटनातिर जान्छ। त्यो डरका कारण हामीले एमालेले प्रस्ताव गरेको उम्मेदवार हराउँछौं,’ उनले भने।
फागुन २५ गतेका लागि राष्ट्रपति निर्वाचन मिति तोकिइसकेको छ।
