नेकपा एमालेका अध्यक्ष केपी शर्मा ओलीले नेकपा एमाले 'एक्लै हिँड्न सक्ने सिंह' भएको बताएका छन्।
एमालेविरूद्ध दस वटा दलहरूको गठबन्धनलाई स्यालहरूको समूहको संज्ञा दिँदै ओलीले एमाले एक्लै हिँड्न सक्ने सिंह भएको दाबी गरे।
मिसन ग्रासरूट अभियानअन्तर्गत चार दिनदेखि लुम्बिनीका विभिन्न जिल्लामा रहेका अध्यक्ष ओलीले मंगलबार पाल्पामा आयोजित अगुवा कार्यकर्ता भेलालाई सम्बोधन गर्दै उक्त कुरा बताएका हुन्।
‘एमाले सिंह हो एक्लै हिँड्छ स्यालहरू हो हुलमा हिँड्ने, स्याल एक्लै हिँड्यो भने खतरा हुन्छ, सिंहलाई एक्लै भए पनि कसैले शिकार गर्ला कि भन्ने डर हुँदैन आफैं शिकार खोज्दै हिँड्छ,’ ओलीले भने।
पूर्व-प्रधानमन्त्री समेत रहेका ओलीले एक्लै निर्वाचनमा होमिएको एमालेलाई पाल्पाका अधिकांश वडा, पालिका र क्षेत्रमा निर्वाचित गराएको भन्दै पाल्पाली जनतालाई धन्यवाद दिए।
‘एमाले एक्लैले पाल्पाका ८१ वटा वडामा ४१ वटामा जितेको छ, १० वटा पालिकामध्ये ६ वटा, चार वटा प्रदेशसभा सदस्यमा दुई र दुइटै प्रतिनिधिसभा सदस्यमा एमालेका उम्मेदवारलाई जिताउनुभएको छ, त्यसको लागि सम्पूर्ण पाल्पाली जनतालाई धन्यवाद दिन चाहन्छु,’ ओलीले भने।
ओलीले अहिले नेपालमा दुई खालका शक्ति, विचार र उद्देश्यका बीचमा लडाइँ भइरहेको उल्लेख गर्दै एकातर्फ दस दल र अर्कोतर्फ एमाले एक्लो शक्ति भएको दाबी गरे।
ओलीले नेपालमा बाहिरी शक्तिको चलखेलका कारण सरकारको स्थिरता र स्थायित्व हुन नसकेको बताए।
‘बाहिरी शक्तिको चलखेलका कारण २००७ साल यताका कुनै पनि सरकारले पूरै कार्यकाल काम गर्न पाएका छैनन्, देशमा स्थिर सरकार र स्थायित्वको लागि एमालेको बलियो शक्ति निर्माण गर्न जरूरी छ,’ उनले भने।
ओलीले दस दलीय गठबन्धनले देशको बारेमा केही बोल्न नसकेको कारण देशको सीमा मिच्ने गरेको उल्लेख गरे।
भारततर्फ लक्षित गर्दै ओलीले भने, ‘मैले प्रधानमन्त्री भएर छाड्दा देश जत्रो थियो प्रचण्ड–शेरबहादुरहरूले अलिकति खुम्च्याए। अलिकति आफ्नो भू-भाग नदेखेको झैं गरे। कस्तो दलाली? कस्तो चाकडी होला?’ उनले अगाडि थपे, ‘मैले यति बोलेपछि भोलि टिकट काटेर कुरा लगाउन जान्छन्। पाल्पामा गएर केपी ओलीले त नेपालको सिमाना घटायो भन्यो नि हजुर त्यसलाई त आउन दिनुभएन है।’
