जिल्ला प्रहरी कार्यालयभित्र आफ्ना पार्टीका जिल्ला अध्यक्ष केदार यादवलाई कुटिएको भन्दै जनता समाजवादी पार्टीका नेता/कार्यकर्ता प्रदर्शनमा उत्रिएका छन्।
मंगलबार दिउँसो प्रहरी निरीक्षक नवीन थापा मगरले आफ्नो कार्यकक्षमा बोलाएर टाउको फुट्ने गरी अध्यक्ष यादवलाई कुटेको भन्दै जसपाका नेता कार्यकर्ताले राजविराजस्थित जिल्ला प्रहरी कार्यालयको गेटअगाडि टायर बालेर प्रदर्शन गरिरहेका छन्। प्रदर्शनका कारण प्रहरी कार्यालय वरपरको अवस्था तनावग्रस्त बनेको छ।
साइबर अपराधसम्बन्धी मुद्दामा आरोपीलाई छोड्दिन सिफारिस गर्न पुग्दा जिल्ला अध्यक्ष यादवलाई प्रहरी निरीक्षक थापा मगरले गालाीगलौज गर्दै कुटपिट गरेकाले प्रदर्शन गरिरहेका जसपाका जिल्ला उपसचिव शम्भुकुमार यादवले बताए।
‘इन्स्पेक्टर नवीन थापामगरले के तपाईं सिफारिस गर्न आएको? शत प्रतिशत केटाकै गल्ती छ उनलाई कारबाही हुन्छ भने। अध्यक्षजीले पहिले अनुसन्धान गर्नुस्, दोषी छ भने कारबाही गर्नुस् भन्नुभयो। इन्स्पेक्टर चर्केर बोलिरहे,’ उपसचिव यादवले भने, ‘इन्स्पेक्टरले म केही सुन्दिँन म जे गर्छु त्यही हुन्छ भनेर फाइट हानदिए। हान्ने तरिकाले लाग्छ इन्स्पेक्टरले केही खाएका थिए। फोहोर गाली गलौज पनि गरे। प्रहरीले कुटेर उल्टै मोबाइल पनि खोसे र थुनामा राखदिए।’
इन्स्पेक्टरलाई तत्काल निलम्बन गर्नुपर्ने जसपाका नेता/कार्यकर्ताको माग छ। प्रहरी रक्षक नभएर भक्षकको रूपमा देखिएकाले आफूहरु प्रदर्शन गरिरहेको उनीहरूको भनाइ छ।
जिल्ला प्रहरी कार्यालय सप्तरीका प्रवक्ता डिएसपी नरेश सिंहले अध्यक्ष यादवलाई इन्स्पेक्टर थापामगरले कुटपिट नगरेको दाबी गरे।
‘साइबरसम्बन्धी एउटा केसलाई लिएर अध्यक्षजी र इन्स्पेक्टर साबको बीचमा विवाद भएको हो। एउटा बच्चीको फोटो टिकटकमा अश्लील तरिकाले एकजना युवकले राखेको थियो। केटालाई कारबाही गर्न नहुने उहाँको कुरा थियो। तर बच्चाको इज्जतसँग जोडिएको कुरा भएकाले केटालाई छाड्न मिल्दैन भनेर हाम्रो इन्स्पेक्टरले भन्नुभयो,’ डिएसपी सिंहले भने, ‘किन हुँदैन भनेर उहाँ (अध्यक्ष यादव) झर्केर बाहिर निस्किँदा टाउको भित्तामा ठोकिएको कुरा आएको छ। ठोक्किएर उहाँको टाउकोमा चोट लागेको हो। उहाँले अहिले कुटेको भन्दै हुनुहुन्छ।’
दुबै पक्षबीच जिल्ला प्रशासन कार्यालयमा छलफलको तयारी भइरहेको डिएसपी सिंहले बताए।