जनकपुरबाट भारतको पटना चल्ने बि आर ०६ सी ९२५१ नेपाल-भारत बसले जलेश्वर ३ धबौली चोकमा ज ६ प १६५० नम्बरको मोटरसाइकललाई ठक्कर दिँदा एक जनाको मृत्यु भएको छ भने तीन जना घाइते भएका छन्।
मृत्यु हुनेमा बारा कलैया का २५ वर्षीय छोटु भन्ने राजकुमार साह रहेको प्रहरीले जनाएको छ।
यस्तै घटनामा परी भारत सोतिहारा बस्ने सोनुकुमार ठाकुर र टुनटुनदेवीको उपचार जनकपुर अञ्चल अस्पताल भइरहेको छ। गम्भीर घाइते भएका मेघनाथ ठाकुरको उपचार विराटनगरस्थित न्यूरो अस्पतालमा भइरहेको महोत्तरीका प्रहरी प्रमुख ईश्वर कार्कीले जानकारी दिए।
एउटै मोटरसाइकलमा चार जना सवार रहेको प्रहरीले जानकारी दिएको छ। बसका चालक र बसलाई प्रहरीले नियन्त्रणमा लिएको छ।
